Ас-үөл боппуруоһугар сөптөөх хайысха оҥоһуллубатаҕына, дьон сааһыран, доруобуйата айгыраан, сүөһүтүн эһэн, аны аҕыйах сылынан сүөһү ахсаана лаппа аҕыйыыр туруктаах. Үөһээ Бүлүүгэ А.Т. Семенова салайар «Булгунньахтаах» бааһынай хаһаайыстыбата 124 ыанар ынахтаах. Анна Трофимовна быйыл 70 сааһын туолбут, Виктор Павлович 69-һа эбит. 2022 сылтан кинилэр бааһынай хаһаайыстыбаларын уолларыгар, Артур Васильевка, туттарбыттар, ол эрээри көмөлөһөн үлэлэһэ сылдьаллар. 2021 сылга элбэх оту, ол иһигэр Маҥаастан атыылаһан, таһан сүөһүлэрин кыстаппыттар. Анна Трофимовна: «Оту тиэйэр- таһар орускуотум 700 тыһыынчаттан таҕыста», – диир.
Эдэр бааһынай хаһаайыстыбалары Тыа хаһаайыстыбатын министиэристибэтиттэн саҕалаан өйүөххэ наада, саллан хаалбаттарын курдук. Билигин чахчы патриот эрэ дьон элбэх сүөһүлээх хаһаайыстыбаны туталлар. Бааһынай хаһаайыстыбалар ороскуоттарын ким даҕаны чуолкайдаан ааҕан көрбөт. Кинилэр оттооһунҥа, от таһыытыгар төһө суумалаах оттугу-уматыгы, сапчааһы тутталларын, комбикорманы, эбиэһи атыылаһылларынн, ону таһынан отторо тиийбэт бааһынай хаһаайыстыбалар төһө оту атыылаһан, ол таһыытыгар төһө ороскуоту көрсүбүттэрин ким да ааҕан, суоттаан көрбөт. Холобурга, «Булгунньахтаах» бааһынай хаһаайыстыба аҥаардас от таһыытыгар 700 тыһыынчаттан тахса солкуобай харчыны ороскуотурдум диирин ааҕыстахха, өрөспүүбүлүкэ үрдүнэн миллиардынан суума тахсара буолуо.
Бааһынай хаһаайыстыбалар ороскуоттара-дохуоттара тэҥнэбил быһыытынан ааҕыллан көрүллүөхтээх . Саамай табыгастааҕа 2021 сылга Ороһу нэһилиэгэр чааһынай урбаанньыт үүт туппутун курдук нэһилиэк аайы дьоҥҥо туһалаах, табыгастаах механизм киириэхтээх. Маны таһынан, нэһилиэк дьаһалтатын анал счетугар үүт субсидията Тыа хаһаайыстыбатын министиэристибэтиттэн быһа бэриллиэхтээх. Бу маннык механизм киириитэ нэһилиэктэр дьаһалталарын баһылыктарын эппиэтинэстэрин үрдэтии быһыытынан көрүллүөхтээх. Үүт собуотун нэһилиэктэргэ баар бааһынай хаһаайыстыбалар даҕаны ылан үлэлэтэн, кэтэх ыаллартан эмиэ үүтү тутан, бородууксуйаларын батаран соҕотуопка сыанатынан төлөһүөхтэрин сөп, кинилэр үүт туппут квитанцияларыгар олоҕуран, нэһилиэк дьаһалтата анал счеттан ханнык баҕарар киэптээх хаһаайыстыбаларга үүт субсидиятын биэриэн сөп этэ.
Степан Дмитриев, Балаҕаннаах, Үөһээ Бүлүү
-
0
-
0
-
0
-
0
-
1
-
0
