Айсен Николаев тыа хаһаайыстыбата бастатан туран өрөспүүбүлүкэ аһылык өттүнэн куттала суох буолуутун хааччыйар, иккиһинэн тыа сирин нэһилиэнньэтэ дохуот ыларыгар сүрүн салаа буоларын мэлдьи бэлиэтиир.
– Ил Дархан сорудаҕынан биһиги тыа хаһаайыстыбатын өйүүр саҥа дьаһаллары толкуйдуубут. Ылыллар бородууксуйаны астыыры-таҥастыыры саҥа таһымҥа таһаарарга наукаҕа тирэҕирэр наада. Биһиги уустук килиимэттээх хотугу дойдубут агропромышленнай комплекса салгыы сайдарыгар, оттон олохтоох табаары оҥорооччулар көрдөрүүлэрин уонна дохуоттарын үрдэтэлэригэр наука ситиһиилэрэ саҥа кыаҕы үөскэтиэхтэрэ, – диэтэ Андрей Тарасенко.
2019 сыллаахтан тыа хаһаайыстыбатыгар наука саҥа арыйыыларын олоххо киллэрэргэ сыллата 19-23 мөл. солк. көрүллэрэ, арай, быйыл көрүллүбэтэҕэ. Итини учуоттаан кэлэр сылга бу салааҕа үбүлээһини 30 мөл. солк. тиийэ үрдэтэргэ этилиннэ. Онон тустаах этиилэр 2023 сыллаах уонна былааннанар 2024-2025 сылларга судаарыстыба бүддьүөтүн туһунан Саха Өрөспүүбүлэтин сокуонун барылыгар киллэриллиэхтэрэ. Санатан эттэххэ, кэнники үс сылга судаарыстыба өйөбүлүгэр тирэҕирэн, кэккэ тэрилтэлэр наука ситиһиилэрин олоххо киллэрдилэр. Ол иһигэр, ТХНЧИ учуонайдара айан таһаарбыт кымыһы көөнньөрөр штаммнара кымыһы оҥорууга эрэ буолбакка, үүтү астыыр-үөллүүр хаһаайыстыбаларга туһаныллыан сөп. Маны таһынан саха сылгытын Индигиирдээҕи тиибин таһаарыы үлэтэ түмүктэннэ. Тустаах докумуоннар Бүтүн Арассыыйатааҕы Сылгы иитиитин научнай чинчийэр институтугар туттарылыннылар, ол кэнниттэн Арассыыйа Федерациятын Тыатын хаһаайыстыбатын министиэристибэтэ саха сылгытын Индигиирдээҕи тиибин силиэксийэ ситиһиитин быһыытынан регистрациялыаҕа.
-
0
-
0
-
0
-
0
-
0
-
1
