Кыһыҥҥы суолу баттаһан, сиэмэни уонна уоҕурдууну тиэйии-таһыы үлэтэ эрдэттэн тэриллэн, күн бүгүҥҥү туругунан ыһыы бурдугун сиэмэтэ (1 864 туонна) толору аҕалыллыбыт. Бу иһигэр сиэмэни үүннэриигэ идэтийэр “Амматааҕы” АУо, “Биэттэ-Агро” ХЭТ уонна Д.В.Илларионов хаһаайыстыбата 491 туонна сиэмэни хааччыйбыттар.
Сүөһү аһылыгын култууратын ыһыытын 42 %-а олохтоох сиэмэнэн ыытыллар. Тиийбэт 2 177 туонна сиэмэни «Туймаада агрохолдинг» ААУо, «Агрокорм» уонна «Агротрейд» хаһаайыстыбалар Алтай кыраайыттан, Новосибирскай уонна Тюмень уобаластарыттан аҕалбыттар. Хортуоппуйга идэтийэр тэрээһиннээх хаһаайыстыбалар сиэмэлэрин 80 %-а баар, онно эбии 1194 туонна сиэмэ хортуоппуй Приморьеттан, Иркутскай уонна Амур уобаластарыттан аҕалыллар. Тыа хаһаайыстыбатын миниистирэ Александр Атласов иһитиннэрбитинэн, сааскы ыһыы үлэтин тэрийэргэ 188,5 мөл. солк. харчы көрүллэн, тустаах хаһаайыстыбаларга тиэрдиллибит.
--Арассыыйа Федерациятын тыатын хаһаайыстыбатын министиэристибэтигэр ыытыллыбыт суһал ыстаап мунньаҕар миниистир Дмитрий Патрушев ыһыы үлэтин болдьоммут кэмигэр уонна толору кээмэйинэн ыытарга сорудахтаата. Онон хас биирдии салайааччы эппиэтинэстээхтик сыһыаннаһан, субвенция үбэ-харчыта уонна оттук-уматык, сиэмэ тыа хаһаайыстыбатын табаарын оҥорооччуларга тиэрдиллиитин тус хонтуруолугар ылара ирдэнэр, -- диэтэ Александр Атласов.
Даҕатан эттэххэ, ыһыы сиэмэтин өрөспүүбүлүкэ таһыттан аҕалыыны аҕыйатар сыалтан, олохтоох сиэмэ хаһаайыстыбаларыгар өйөбүл оҥоһуллан, 560 туонна хортуоппуй элита сиэмэтин итиэннэ 2,5 тыһ туонна бурдук сиэмэтин үүннэрэргэ 12,5 мөл солк көрүллүбүтэ. Ону таһынан, 86 туонна бурдук сиэмэтин уонна 1 тыһ туонна сиэмэ хортуоппуйу атыылаһарга 27 мөл. солк көрүллүөхтээх.
Бу туһунан Бырабыыталыстыба Бэрэссэдээтэлин солбуйааччы Михаил Никифоровка ыытыллыбыт сүбэ мунньахха этилиннэ. Вице-премьер улуустар баһылыктарыгар бааһына иэнин кэҥэтэргэ итиэннэ ыһыыны хаачыстыбалаахтык, агротехнологияны толору тутуһан ыытарга, аны күһүн өлгөм үүнүүнү ыларга сорук туруорунан үлэлииргэ сорудахтаата. Ыһыы кэмин көрсө тиэхиньикэлэри бэлэмнииргэ, оттук-уматык боппуруоһун быһаарарга эттэ.
-
0
-
0
-
0
-
0
-
0
-
0
