.jpg)
Дэкээдэ олунньуга Алтаай Өрөспүүбүлүкэтин баһылыга Олег Хорохордин Алтаай эпоһын дэкээдэтин тэрийэр туһунан илии баттаабыт дьаһалыгар олоҕуран аан бастаан тэриллэн ыытылынна.
Ил Түмэн бастакы вице-испиикэрэ Александр Жирков Евразия норуоттарыгар культурнай, духуобунай нэһилиэстибэлэрин харыстааһыҥҥа, үйэтитиигэ, киэҥ эйгэҕэ таһаарыыга дьоһуннаах, утумнаах үлэни ыытан, араас норуоттар эпическэй нэһилиэстибэлэрин хардарыта тылбаастаһар, парырааманнар алтыһан ыытар үлэлэрин, култууранан бииргэ үлэлээһиннэрин олохтоон, Россия норуоттарын икки ардыларыгар доҕордуу сыһыаны бөҕөргөтүүгэ дириҥ суолталаах сүҥкэн кылааты киллэрэр. Александр Николаевич ыытар үлэтинэн сирэйдээн бырааттыы норуоттар Саха Өрөспүүбүлүкэтэ ыытар бэлиитикэтин үрдүктүк сыаналыыллар, холобур тутталлар. Бу да сырыыга Алтаай эпоһын дэкээдэтэ Саха Өрөспүүбүлүкэтин холобурунан тэрилиннэ. Ол да иһин Александр Жиркову анаан ыҥырдылар уонна дэкээдэ аһыллыытыгар бэлиэтээн махтаннылар, инникитин икки өрөспүүбүлүкэ икки ардыгар бу эйгэҕэ хардарыта бииргэ үлэлээһин күүһүрэн иһэригэр баҕаларын тиэртилэр. Бииргэ үлэлээһин чэрчитинэн Саха сирин бэрэстэбиитэлэ Алтаай эпоһын дэкээдэтин тэрээһиннэригэр, ол иһигэр Алтаай кайчыларын Сүбэтин тэрийэр мунньаҕар, Алтаай Бырабыыталыстыбата тэрийэр алтаай тыллаах норуоттар эпическэй нэһилиэстибэлэрин үөрэтии уонна тарҕатыы туһунан ЮНЕСКО кыттыылаах научнай кэмпириэнсийэҕэ кыттыыны ылыаҕа диэн быһаарыллыбыта.
Александр Жирков Алтаай Өрөспүүбүлүкэтигэр сырыытын түмүгүнэн Саха Өрөспүүбүлүкэтин Ил Дархана Айсен Николаев аатыгар Алтаай Өрөспүүбүлүкэтин Бырабыыталыстыбатыттан маннык ис хоһоонноох сурук кэллэ:
Ытыктабыллаах Айсен Сергеевич!
Эйиэхэ ытыктабылбын уонна Эн бэрэстэбиитэлиҥ – Саха Өрөспүүбүлүкэтин Судаарыстыбаннай Мунньаҕын (Ил Түмэн) Бэрэссэдээтэлин Бастакы солбуйааччы А.Н. Жирков Алтаай Өрөспүүбүлүкэтин Баһылыгын Ыйааҕынан 2023 сыллаахха алтаай героическай эпоһын дэкээдэтин ыытыыга кыттыытын иһин махтал тылларын тиэрдэбин.
Александр Николаевич алтаай уонна саха эпостарын: «Маадай-Кара» уонна «Ньургун Боотур» тиэкистэрин хардарыта тылбаастааһын бырайыагын көҕүлээччи уонна тэрийээччилэриттэн биирдэстэрэ буолар. Александр Николаевич – Хотугу уонна Илин Уһук норуоттарын устуоруйаларын уонна култуураларын дириҥник билээччи, Алтаай Өрөспүүбүлүкэтин уонна Саха Өрөспүүбүлүкэтин норуоттарын икки ардыларыгар доҕордуу сыһыаны бөҕөргөтүүнү олохтооччу быһыытынан билиниини, ытыктабылы ылар, Евразия норуоттара биир буолууларын идиэйэтин тарҕатыыга-тэнитиигэ, доҕордуу норуоттар чугасаһыыларыгар уонна культурнай хардарыта дьайсыыларыгар сүдү кылааты киллэрэр.
Саха сирин холобурунан Россия Федерациятын национальнай өрөспүүбүлүкэлэригэр эпическэй нэһилиэстибэни харыстааһыҥҥа, анал сокуоннары, бырагыраамалары ылынан эрэллэр. Эпическэй нэһилиэстибэ дэкээлэрин тэрийии эмиэ бу саҕаламмыт киэҥ далааһыннаах үлэ биир сорҕото буолар.
-
0
-
0
-
0
-
0
-
0
-
0
