--Түмсүү туохха тэриллэрий? Сомоҕо күүһүнэн туох эрэ туһалааҕы оҥороору. Ол курдук, биһиги, уларыта тутуулаах 1990 сылга оскуоланы бүтэрэн, олох киэҥ аартыгар үктэммит көлүөнэ дьон, түмсүү тэриммиппит.
Былырыын бырайыак оҥорон, НКО-лар куонкурустарыгар кыттан, грант ылбыппыт. Дьокуускай управатыттан Таалай күөл үрдүгэр сир ылан, онно “Алгыстаах аартык” диэн выпускниктар сквердэрин оҥорбуппут. Күһүн мас олордубуппут.
Оттон бүгүн, ол эбэтэр бэс ыйын 3 күнүгэр, выпустан Дьокуускайга олорооччу өттө, манна үөрэх кыһаларын бүтэрбиттэр, субуотунньук тэрийэн, сибэкки, клумбалаах от-мас атыылаһан аҕалан олортубут, былырыын үүннэрбит мастарбытыгар уу куттубут.
Үчүгэй көдьүүстээх үлэ буолла. Ити иһин кэлэн көмөлөспүт уонна харчынан өйөөбүт үөлээннээхтэрбитигэр махтанабыт.
Бары бу курдук түмсүүлээх буолуоххайыҥ. Сахабыт Сирэ, Дьокуускайбыт тупса, киэркэйэ турарыгар хас биирдиибит тус кылаатын киллэрдин. Дойдубутун харыстыаххайыҥ, көрө-харайа сылдьыаххайыҥ.
Куораппыт кыраһыабай буолара биһигиттэн, олохтоохтортон, быһаччы тутулуктаах. Көҕөрдүү үлэтигэр кыттыһыаххайыҥ, аны аҕыйах сылынан Дьокуускайбыт күөххэ сууламмыт, сибэккинэн симэммит куорат буоларын ситиһиэххэйиҥ, -- диэн кэпсээтэ Сайдам Михайлов, абыраллаах “Атлант-Саха” киин дириэктэрэ.
- 15
- 3
- 0
- 0
- 0
- 0