Билии күнүгэр Мугудай орто оскуолатын 1972 сыллаахха бүтэрбит дьоннор 50 сыллаах үбүлүөйдэригэр мустаннар, Көһөрүллүү 80 сылын чэрчитинэн, «Эйгэ» Норуот айымньытын дьиэтигэр бэртээхэй бэлэҕи оҥордулар. Ол курдук, сыана бэтэрээнэ, нэһилиэккэ култуура сайдыытыгар улахан өҥөлөөх Евдокия Федоровна Дьячковская хатыҥ уонна талах мастары олорто, оттон үбүлүөйдээх выпускниктар олорон сынньанарга анаан, ыскамыайканы бэлэх ууннулар.
Саха Өрөспүүбүлүкэтин култууратын үтүөлээх үлэһитэ, «Гражданскай килбиэн», «Арктиканы уонна хоту дойдуну сайыннарыыга кылаатын иһин» бэлиэлэр хаһаайкалара, Муома улууһун Бочуоттаах олохтооҕо, музыкальнай оскуола дириэктэрэ, биир дойдулаахпыт Анна Митрофановна уонна РФ салгын тырааныспарын туйгуна, Саха сирин авиациятын бэтэрээнэ, «Муома улууһун сайдыытыгар үтүөлэрин иһин» бэлиэлээх Алексей Иннокентьевич Федоровтар дьиэ кэргэнинэн бачыым көтөҕөн, матырыйаалын, кырааскатын хааччыйан, тутар биригээдэни кэпсэтэн, төлөөн «Эйгэҕэ» киирэр ааҥҥа пандустаах кирилиэһи ситэрэн оҥортордулар.
Бүгүҥҥү үөрүүнү-көтүүнү бэлэхтээбит дьоммутугар өссө төгүл махтанабыт, баҕарабыт эһиэхэ туруоруммут сыалгыт барыта туоларыгар, ситиспит ситиһиилэргит онно бигэ тирэх буолалларыгар.
"Үтүө санаалаах дьоммут, алгыс курдук амарах санааланыҥ, эҕэрдэ курдук эйэҕэс сүрэхтэниҥ! Айар дьулуурдаах, алгыс аргыстаах төрөөбүт дойдубутугар саҥа сандаарбыт күн үлэ күнүнэн, үлэ үөрүүтүнэн, үлэ дьолунан тосхойдун!!! Дьоллоох буолуҥ, чэгиэн-чэбдик буолуҥ!!! Төрөөбүт нэһилиэкпит тула түмсүөҕүҥ!" -- диэн Г.Е.Скрябин аатынан «Эйгэ» НАДь кэлэктиибэ суруйар.
-
1
-
2
-
0
-
0
-
0
-
0
