-Быйыл биһиэхэ наһаа тымныы сайын. Аҕыйах күн эрэ сылыйан ылбыта. Оптуорунньуктан, ол эбэтэр от ыйын 5 күнүттэн, ардахтаан саҕалаабыта. Үһүс күнүттэн, чэппиэртэн, дохсуннук кутан барбыта. Ол күн Дулҕалаах үрэхпит хаатынан буола охсубута, онтон таһынан тахсан, начаас ууга барбыппыт.
Маннык 2004 сыл сайыныгар ууга бара сылдьыбыппыт. Онно уу биир суукка эрэ турбута. Ол кэннэ уһун сайыны быһа суола-ииһэ суох олорбуппут. Дьаабы хартыына этэ: барыта алдьаныы-кээһэнии.
Ити сылтан ыла үрэхпит сүнньэ уларыйбыта. Наар ууга барар кутталыгар олоробут. 2014 cыл сайыныгар эмиэ хатыламмыта, ол эрээри онно нэһилиэк аҥаара эрэ былдьаммыта.
2004 cылтан ыла Бырабыыталыстыба отчуота кэллэҕин ахсын үрэхпит сүнньүн көннөрөргө туруорсабыт. Бүтэһигин СӨ Бырабыыталыстыбатын Бэрэссэдээтэлэ Андрей Тарасенко бэйэтинэн тиэхиньикэнэн көмөлөһүөх, бульдозер, экскаватор биэриэх буолан эрэннэрбитэ. Күн бүгүнүгэр диэри күүтэбит...
Егор Борисов Ил Дархан буола илигинэ кэлэ сылдьыбыта. Эмиэ болҕомтоҕо ылбытын эппитэ... Ол эрээри 2004 сылтан ыла туох да уларыйа илик.
Бырабыыталыстыба бэрэссэдээтэлин солбуйааччы Д.Д. Садовников биһиэхэ кэлэ илик. Сэбээн Күөлүгэр сылдьыбыт. Арааһа, күн-дьыл туруга көтөр ааллары харгыстыыр быһыылаах. Ардах тохтоото эрээри, метео-саайты киирэн көрдөххө, сотору эмиэ ардахтар диэн. Сэбээн Күөл уута биһигинэн таарыйан ааһар. Онон өссө уу эбиллэрэ буолуо... Өтөрүнэн уубут түспэтэ буолуо диэн дьаарханабыт.
Бэҕэһээ биир бөртөлүөт кэлэн, 14 киһини улуус киинигэр Баатаҕайга илдьибитэ. Оҕолору уонна кырдьаҕастары.
Билигин оскуолабыт завуһа үөрэнээччилэр испииһэктэрин оҥоро сылдьар. Лааҕырга ыыталлар үһү. Соҕуруу эбэтэр Дьокуускайга – билбэппин. Сиэннэрбин суруйтардым.
Түүн биир чааска, сураҕа, кимнээх эрэ кэлбиттэр үһү. Социальнай эбийиэктэри көрө сылдьаллар. Кэтэхтэри таарыйа иликтэр. Баатаҕайтан тыа хаһаайыстыбатын исписэлииһэ хотонноох ыаллары кэрийэр.
Барыта уу. Ханна тахсыахпытый? Олоробут. Мин дьиэм муостатыттан бычылыйбыта. Атыттар миэбэллэрэ кытта уста сылдьар.
Бэҕэһээ биир остуолба сууллан, уота суох олоро сылдьыбыппыт. Хата, оҥордулар. Эппитин төһө батарынан морозильникка, холодильникка симэ сатаатыбыт да, улахан аҥаара баппата.
Нэһилиэккэ 360 киһи олорор буолуохтаах. Олор бары көмөҕө наадыйаллар. Эрэнэбит, кэлэн кыһалҕабытын быһаарыахтара диэн...
-
0
-
0
-
0
-
1
-
4
-
0
