Ол эрээри быйыл баскыһыанньаҕа, ол эбэтэр бэс ыйын 26 күнүгэр буолуоҕа. Ити күн иннинэ Дьокуускайга мас-рестлинг аан дойдутааҕы чемпионата түмүктэнэр. Даҕатан эттэххэ, бу тэрээһин мас-рестлинг аан дойдутааҕы күнүн аан бастаан бэлиэтээһин буолар.
Үөрүүлээх тэрээһин чэрчитинэн Үс Хатыҥҥа сэргэ туруоруохтара. Сэргэни Саха Сирин норуодунай худуоһунньуга, муос кыһааччы, муус оҥоһуктар маастара Федор Марков оҥоруо.
Санаттахха, Дьокуускайга бэс ыйын 23-25 күннэригэр, Саха АССР тэриллибитэ 100 сылынан, мас-рестлинг аан дойдутааҕы IV чемпионата ыытыллар. Тиһэх чахчынан, 47 дойдуттан 230 спортсмен кыттарын бигэргэппит.
Чемпионат «Триумф» спортивнай бэлэмнэнии киинигэр ыытыллыаҕа. Бэс ыйын 25 күнүгэр Туймаада ыһыаҕар абсолютнай кыайыылаах аатыгар киирсиэхтэрэ.
Күрэхтэһиигэ Арассыыйа уонна тас дойдулар чулуу мадьынылара күүстэрин-кыахтарын холонон көрүөхтэрэ. Арассыыйа сүүмэрдэммит хамаандатыгар биһиги спортсменнарбытыттан ураты атын эрэгийиэннэртэн эмиэ бааллар — Иван Галкин (125 кг), Виктор Колибабчук (125+ кг), Мохинур Абдузойирова (85 кг) уонна Кристина Кочесокова (абсолютнай категория).
Маны тэҥэ, чемпионат кэмигэр Мас-рестлинг аан дойдутааҕы федерациятын гимнин сүрэхтиэхтэрэ. Өрөгөй ырыатын тылын СӨ норуодунай суруйааччыта Наталья Михалева-Сайа суруйда. Кини маныаха биллэриллибит куонкурус кыайыылааҕа буолбута.
Чемпионат чэрчитинэн Мас-рестлинг аан дйодутааҕы федерациятын кэнгириэһэ ыытыллыаҕа, салаа сайдарыгар туһуламмыт меморандуму ылыныахтара.
Тэрээһини сырдатыыга федеральнай ханаалтан Владимир Иваницкай салайааччылаах устар бөлөх үлэлиэҕэ. Күрэхтэһиини «Саха» НКИХ уонна «Боец», «Матч», «Спортивнай» ханаалларынан көрүөххэ сөп.
-
2
-
0
-
0
-
0
-
0
-
1
