Баалы гимназия дириэктэрэ Владислав Окороков эҕэрдэ тылынан арыйда уонна үөрэххэ, үлэҕэ ситиһиилэри баҕарда. Гимназистары норуот дьокутаата, Ил Түмэн аартыка уонна хотугу аҕыйах ахсааннаах норуоттар боппуруостарыгар кэмитиэт бэрэссэдээтэлэ Елена Голомарева видео-сибээһинэн эҕэрдэлээтэ, оҕолору өрүү бэйэлэрин кыайыыларынан-хотууларынан үөрдэ сылдьалларыгар ыҥырда.
- Маннык тэрээһин билиҥҥи олох очурдарыттан тэйэ түһэн, үөрүүнэн алтыһарга, сынньанарга аналлаах чаҕылхай түгэнинэн буолар, - диэн гимназия дириэктэрэ Владислав Окороков кэпсиир.
- Гимназистар бааллара XIX-XX үйэ тыынынан илгийэр. Кыргыттар уһун мааны былааччыйалара, уолаттар көстүүмнэрэ, дьикти, кэрэ классическай муусука тыаһа ааспыт үйэлэри санатта. Биллэн турар, маннык тэрээһини ыытарга, эрдэ хас эмэ нэдиэлэлээх кичэллээх бэлэмнэнии ыытыллар. Баал түгэнэ, остуоруйаҕа курдук, күлүм гынан ааһар. Баал кэмигэр бары быраабыла кытаанахтык тутуһуллар. Үҥкүү хамсаныыларын, тутта-хапта сылдьыыны, үчүгэй «манераны» оҕолор бэркэ баһылаатылар. Кыргыттар кавалердарын кытта реверансынан эҕэрдэлэһэллэр. Үөрэнээччилэр бу кэмҥэ историяны, култуураны билсэллэр уонна үөлээннээхтэрин кытта ураты эйгэҕэ көрсөллөр. Манна бастатан туран кэрэ уонна алтыһыы култуурата өрө тутуллар.
Баалы айар нүөмэрдэр ситэрэн-хоторон биэрдилэр. Ол курдук, Оҕо ускуустубатын оскуолатын учуутала София Петрова «Керубино» ариятын үрдүк таһымнаахтык толордо, гимназия учууталлара уонна үөрэнээччилэрэ Анна Ахматова хоһооннорун иэйиилээхтик аахтылар. Түмүктээн эттэххэ, гимназия баала диэн – уһулуччулаах тэрээһин. Баал эйгэтэ аныгы ыччаты улуу дойдубут урукку историятын ытыктыырга, харыстыырга, кэрэни кэрэхсииргэ, үтүө майгыга иитиигэ улахан суолталаах, - диэн санаатын Владислав Витальевич үллэстэр.
Сахабыт Сирин хотугулуу-илиҥҥи өттүгэр 1996 сыллаахха аан маҥнайгы гимназия арыллыыта үөрэҕирии систиэмэтэ атын, үрдүк таһымҥа тахсыытын бэлиэтэ этэ.
Белай Гора гимназията СӨ норуотун хаһаайыстыбатын үтүөлээх үлэһитэ, РФ норуот үөрэҕириитин туйгуна, гимназия маҥнайгы дириэктэрэ В.Н.Никулин көҕүлээһининэн арыллыбыта. Көҕүлээһини Абый улууһун баһылыга Н.И. Соломов күүскэ өйөөбүтэ. Кини СӨ Бэрэсидьиэнэ М.Е.Николаевка уонна СӨ үөрэҕириитин миниистиригэр Е.И.Михайловаҕа тустаах этиинэн тахсыбыта улахан кэскиллээх буолбута. Белай Гора гимназиятын сайдыытын кэнсиэпсийэтэ 1996 сыл балаҕан ыйын 1 күнүгэр бигэргэтиллибитэ.
-
1
-
0
-
0
-
0
-
0
-
0
