Сахабыт Сирин араас муннуктарыттан мустубут педагогическай үлэһиттэр сойуустарын салайааччылара, чилиэннэрэ ирэ-хоро учууталлар олохторун хаачыстыбатын үрдэтиигэ усулуобуйалары тэрийиини, турар кыһалҕалары, ыарахаттары ырыталлар, инники үлэҕэ былааннары торумнууллар.
Сүрүн дакылааттары Ил Түмэн наукаҕа уонна үөрэххэ сис кэмитиэтин бэрэссэдээтэлэ Антонина Григорьева, РФ норуотун үөрэҕириитин уонна билимин идэлээхтэрин сойууһун Саха Сиринээҕи тэрилтэтин бэрэссэдээтэлэ Янина Щепанская, үөрэҕирии миниистирин солбуйааччы Алевтина Аргунова, СӨ идэлээхтэрин сойуустарын бэрэссэдээтэлэ Николай Дегтярев о.д.а. иһитиннэрдилэр.
Ил Түмэн наукаҕа уонна үөрэххэ сис кэмитиэтин бэрэссэдээтэлэ Антонина Григорьева педагогическай үлэһиттэр ураты статустарын сорох хааччыллыытын туһунан кэпсээтэ.
Маны тэҥэ эдэр испэсэлиистэри өйүүр сыалтан урукку кэмнэр курдук “көтөҕөр үбүлээһини (подъемные)” төлөөһүнү, тыа сиригэр, оробуочай бөһүөлэктэргэ үлэлии барааччыларга хамнаска эбилиги, бастаан үлэлээччилэргэ төлөбүрдэри, үлэ миэстэтигэр тиийиилэригэр бырайыастарын толуйууну сокуонунан мэктиэлииргэ министиэристибэни кытары үлэлииллэрин иһитиннэрдэ. Төгүрүк остуол кыттыылаахтара саҥа сокуон барыла педагогтар бырааптарын үрдэтэрин, эдэр испэсэлиистэри социальнай өттүнэн өйүүрүн, уһуйуу институтун олохтуурун сөпсөстүлэр.
Антонина Афанасьевна тыҥаан турар сүрүн боппуруостарга тохтоото, маныаха идэлээхтэр сойуустарын оруола улаханын ыйда. Холобур, үөрэх тэрилтэлэригэр хапытаалынай өрөмүөн ыытыллара ирдэнэр буоллаҕына, үөрэҕирии управлениетыттан анал реестрга киирэргэ сайаапка түһэриллиэхтээх. Хомойуох иһин, сорох улуустартан маннык сайаапка этиллибит болдьоххо киирбэт, ол эрэн миэстэтигэр кыһалҕа баар. Маныаха Антонина Афанасьевна идэлээхтэр сойуустарын салайааччыларыгар бу боппуруоска управлениелары кытары күүскэ үлэлииллэригэр сүбэлээтэ.
2025 сылтан уһуйааннарга хапытаалынай өрөмүөн оҥоруутугар бырагыраамма олоххо киириэ. Маныаха эмиэ тустаах докумуоннары кэмигэр тиксэрэр, реестрга киирэр ирдэнэр.
Үөрэх миниистирин солбуйааччы Алевтина Аргунова Педагог уонна уһуйааччы сыла Саха Сиригэр хайдах ыытылла турарын, сүрүн ситиһиилэри сырдатта.
Кылгастык кэпсээтэххэ, өрөспүүбүлүкэ таһымнаах 55 араас тэрээһин ыытыллыбыт, учууталлар истэригэр 19 куонкурус тэриллибит.
Киэн тутта “Сыл Учуутала” уонна “Төрүт тыл бастыҥ учуутала” Арассыыйатааҕы куонкурустар лауреаттара Дьяконов Иван Герасимовиһы эттэ. Кини Бэрдьигэстээх улуустааҕы гимназиятын учуутала. Бүтэһик 15 сылга аан маҥнайгытын Саха Сирин аатыттан Арассыыйа 15 бастыҥ учууталларын иһигэр киирбит.
Мунньах түмүгэр биир идэлээхтэр эрэкэмэндээссийэ ылыныахтара.
Сиһилии “төгүрүк остуол” туһунан “Ил Түмэн” хаһыат аныгыскы нүөмэригэр билсиҥ.
-
0
-
0
-
0
-
0
-
0
-
0
