Ил Түмэн Социальнай бэлиитикэҕэ, үлэҕэ уонна дьарыктаах буолууга сис кэмитиэтин бэрэссэдээтэлэ Алена Атласова тус көрсүһүүлэри ыытар кэмигэр үлэ уонна социальнай сайдыы миниистирин солбуйааччыта Наталья Черноусованы уонна тутуу министиристибэтин тутууга уонна олох-дьаһах бэлиитикэтин Департаменын салайааччытын солбуйааччы Марианна Соловьеваны ыҥырбыта ураты көдьүүстээх буолла.
Биэнсийэлээх, инбэлиит М. 30 тыһыынча солкуобайтан кыра биэнсийэлээх гражданнарга эбии төлөбүр туһунан боппуруоһутуруорда. Норуот дьокутаата үлэ уонна социальнай сайдыы министиэристибэтэ боппуруоһу Арассыыйа социальнай Пуондатын кытары үөрэтэригэр, 30 тыһыынча солкуобайтан кыра биэнсийэлээхтэр ахсааннарын чопчулуурга ыйда. Бу боппуруос быйыл ыам ыйыгар былааннаммыт “СӨ аҕам саастаах кыраасданнар олохторун тупсарыы миэрэлэрэ” диэн төгүрүк остуолга ырытыллыаҕа.
Салгыы норуот дьокутаатыгар С. диэн биэнсийэлээх олорор усулуобуйатын тупсарыыга, төрөппүттэрин, тыыл бэтэрээннэрин ааттарын үйэтитиигэ боппуруостары көтөхтө. Киниэхэ дьиэҕэ-уокка төлөнөр субсидия туһунан сиһилии быһаардылар. Оттон төрөппүттэрин аатын үйэтитии боппуруоһа Кэбээйи улууһун дьаһалтатын кытары көрүллэр.
П. диэн кырасдаанка С гепатитынан ыалдьар бииргэ төрөөбүт быраатыгар ыарахан сыаналаах эми атыылаһыыга көмө буолалларыгар көрдөстө. Маныаха норуот дьокутаата доруобуйа харыстабылын министиэристибэтигэр вирус утары терапияны ааһарга ирдэбил ыытта.
Ил Түмэн Тутууга, олох-дьаһах хомунаалынай хаһаайыстыбатыгар уонна энэргиэтикэҕэ сис кэмитиэтин бэрэссэдээтэлигэр Александр Корякиҥҥа кырасданьыын С. сытыы боппуруоһу туруорда. Ол курдук, кини Саха Сиригэр кыһыҥҥы кэмҥэ мууһунан суоллары эрдэ арыйыыга этиилэрин киллэрдэ, ыйытыыларын туруорда. Киирбит этиилэр инникитин сыныйан үөрэтиллиэхтэрэ.
Ил Түмэн култуураҕа уонна сонуну киэҥник тарҕатар ситимнэргэ сис кэмитиэтин бэрэссэдээтэлин солбуйааччы Захар Никитин Мэҥэ Хаҥалас улууһун Төҥүлү нэһилиэгин олохтоохторун кытары көрүстэ. Боппуруостар үксүн социальнай өйөбүл тула турдулар. Ол иһигэр, үлэ бэтэрээнин уонна маҥнайгы группалаах инбэлиити көрөн олорооччу дьиэтигэр толору хааччыллыыны холбооһуну субсидиялааһын туһунан, Анал байыаннай дьайыы кыттыылаахтарыгар хомуллубут көмөнү Дьокуускайга диэри тиэрдиини чопчулаатылар. Тыа хаһаайыстыбатын боппуруостара эмиэ таарылыннылар. Сүрүннээн субсидия биэриитигэр киирбит уларыйыылары чуолкайдастылар.
Хас биирдии ыйытыктаах кэлбит киһиэхэ толору хоруй бэрилиннэ, кыһалҕалар хонтуруолга ылылыннылар.
Хаартыска: Ил Түмэн пресс сулууспата
-
0
-
0
-
0
-
0
-
0
-
0
