Ньургуйаана Михайлова, Ньурба улууһун дьокутааттарын сэбиэтин бэрэссэдээтэлэ:
-- Бүгүн биһиги, Арассыыйа Федерациятын 89 субъегын олохтоохторо, дойдубут инники кэскилин туһугар эппиэтинэспитин өйдөөн тураммыт, бу бырааһынньыгы бэлиэтиибит.
1990 сыллаахха бэс ыйын 12 күнүгэр Судаарыстыбаннай суверенитет туһунан декларация ылыллыаҕыттан, Арассыыйа устуоруйатыгар саҥа кэрдиис түһүмэх саҕаламмыта. Онтон ыла бу күн биһиги дойдубут сүүһүнэн омуктаах норуотун биир сомоҕолоһуутун кэрэһилиир.
Саха норуота күн бүгүнүгэр диэри Арассыыйа чэчирии сайдарын туһугар өйүн-санаатын холбоон кэллэ. Судаарыстыба бигэ туруга, сайдыыта дойду хас биирдии олохтооҕун, норуоттарын түмсүүлээх үлэтиттэн тутулуктаах.
Дойдубутугар буола турар балаһыанньаны бары билэбит. Сахабыт Сирин буойуннара Арассыыйа бары норуоттарын кытары инники күөҥҥэ дойдубут туһугар, неонацистары утары киирсэллэр. Кинилэр хорсун быһыыларын туоһутунан, 11 биир дойдулаахпыт «Арассыыйа Дьоруойа» ааты ылбыттара буолар.
Биһиги, ньурбалар, биир дойдулаахпыт Андрей Григорьев-Тута дьоруойдуу быһыытынан киэн туттабыт. Соторутааҕыта, ыам ыйын 12 күнүгэр кини төрөөбүт күнүн бэлиэтээтэ. Бу күн «Сокровищница Якутии» түмэлгэ киниэхэ 25 караттаах бэйэтин аатын сүгэр алмаас куоппуйатын үөрүүлээх быһыыга-майгыга туттардылар.
Манна даҕатан эттэххэ, Ил Дархан Айсен Николаев 11 алмааска Арассыыйа Дьоруойдарын: Андрей Григорьев, Николай Евдокимов, Филипп Евсеев, Дмитрий Егоров, Петр Киприянов, Александр Колесов, Дмитрий Куценко, Родимир Максимов, Алексей Неустроев, Николай Соболев уонна Игорь Юргин ааттарын иҥэрбитэ.
Саха Сирэ Арассыыйа биир улахан эрэгийиэнэ буолар, өрөспүүбүлүкэ өр сыллар усталарыгар судаарыстыба сайдыытыгар сүҥкэн кылаатын киллэрсэн кэллэ. Саха норуотун инники кэскилэ Арассыыйа сайдыытын кытары ыкса ситимнээх. Маныаха биһиги улууспут эмиэ бэйэтин кылаатын киллэрсэр: бырамыысыланнас сайдар, социальнай эбийиэктэри тутуу тиһигэ быстыбат, оҕо-аймах ахсаана элбиир.
Бука барыгытын дойдубут, аныгы Арассыыйа, төрөөбүт күнүнэн эҕэрдэлээн тураммын, күөх халлааны, бигэ туругу, самныбат санааны, кытаанах доруобуйаны баҕарабын!
Хаартыскалар: Ньурба улууһун ыччат дьыалаларыгар уонна имидж бэлиитикэтигэр управлениетын архыыбыттан.
-
0
-
0
-
0
-
0
-
0
-
0
