Сийиэс бастакы күнүгэр муниципальнай тэриллиилэр баһылыктарын кытта хонтуруоллуур-суоттуур уорганнар үлэлэрин тула дискуссионнай былаһаакка үлэлээтэ. Манна уопсайа 53 дэлэгэт кыттыыны ылла. Элбэх дакылаат оҥоһулунна, иһитиннэрии көрүлүннэ.
Дэлэгээттэр дакылааттарга даҕаны, боппуруос да туруоруутугар долгутар хайысхаларын чуолкайдастылар.
Өрөспүүбүлүкэ үрдүнэн бүгүҥҥү туругунан тирэх пууннар испииһэктэригэр уопсайа 43 куорат, улуус киинэ киирсэрэ мунньахха этилиннэ. Маныаха олоххо-дьаһахха аналлаах инфраструктура оҥоһуутугар национальнай бырайыак көмө буолуохтаах, олох хаачыстыбата тупсуохтаах диэн этэн туран, хас биирдии улууска тирэх пуун баар буоларын ситиһэргэ этии киирдэ.
Муниципальнай сулууспалаахтар хамнастара кыратын, онтон сылтаан каадырынан хааччыллыы мөлтөҕүн, баҕалаахтар суохтарын ыйдылар.
Кэккэ боппуруостары туруордулар. Ол курдук, анал байыаннай дьайыыга кытта сылдьар киһи баһылыгынан талылыннаҕына байыаннай сулууспаттан уурайар дуо диэн ыйыппыттарын, ол сокуонунан көҥүллэнэрин, байыаннай сулууспаттан тохтуурун эттилэр. Ол эрэн, дьокутаатынан талыллыбыт киһи байыаннай дьайыыга кыттыыттан босхоломмот.
Аартыка эргимтэтин боппуруостара сытыытык турдулар. Уопсастыбаннай палаата бэрэстэбиитэлэ Сергей Сюльскай Аартыка эргимтэтигэр килиэп астааһынын боппуруоһа сытыырхайан турарын ыйда. Ол төрүөтэ - хомунаалынай төлөбүрдэргэ, уокка-күөскэ сыана үрдээһинэ. Атыы-логистика киинэ табаары ситэтэ суох тиэрдэрин, үпкэ кэккэ ыарахаттары көрсөллөрүн ыйда. Олохтоохторго хамнас алын кээмэйин улаатыннарарга этии киллэрдэ.
Өрөспүүбүлүкэ иһигэр сөмөлүөтүнэн көтүүгэ, ордук хоту улуустарга билиэт сыаната үрдүгүн, сыана биир хайысхаҕа ортотунан 50 тыһыынча солкуобай буоларын ыйан туран, туох үлэ барарын ыйыттылар.
Алексей Ильич эппиэттээбитинэн, бу эргэ, экэниэмикэ өттүнэн көдьүүһэ кыра көтөр пааркаттан тутулуктаах. Ол курдук, улуустарга үксүн АН-24 сөмөлүөт туттуллар, сиэрийэнэн тахсар саҥа моделлаах сөмөлүөттэр бүгүҥҥү күҥҥэ суохтар.
Онон манна туһааннаах үлэ барар. Өрөспүүбүлүкэ бүддьүөтүттэн хас биирдии эриэйискэ 9 кириэһилэҕэ субсидия харчыта көрүллэр. Былырыын “Полярные авиалинии” хампаанньа үбүлээһин иннинэ чэпчэтиилээх билиэттэри атыылаабыт, ону толуйар үбэ хойутаабытыттан кэккэ ыарахаттары көрсөр. Ил Түмэн авиатарыыптары субсидиялааһыҥҥа 500 мөл. солкуобайы көрөргө эрэкэмэндээссийэлээбит. Маны сэргэ, өрөспүүбүлүкэ иһигэр дьону сөмөлүөтүнэн таһыыга федеральнай субсидия көрүүтүгэр үлэ барар. Маннык үбүлээһини уопсайа 5 эрэгийиэн көрдүүр. Бастакы сылларга истэ да барбат эбит буоллахтарына, билигин тырааныспар уонна экэниэмикэ сайдыытын министиэристибэлэрэ өйөөбүттэр, үп министиэристибэтин быһаарыныытын күүтэллэр.
Муниципальнай сулууспалаахтар социальнай өттүнэн хааччыллыыларыгар тохтоотулар. Биэнсийэ олохтонуутугар уопсайа 15 сыллаах муниципальнай ыстаат баар буоллаҕына эбии төлөбүр көрүллэр. Ыстааска быыстала суох үлэлээһин диэн өйдөбүл суох. Баһылыктарга биэнсийэнэн хааччыллыыга 1,28 коэфицент олохтоммут. Уоппускаҕа тохтоотоххо, муниципальнай сулууспалаахтар сылын ахсын 67 күн сынньанар бырааптаахтар.
Хаартыска: Василий Кононов
-
0
-
0
-
0
-
0
-
0
-
0
