Уус Алдан улууһун Курбуһах нэһилиэгин баһылыга Владимир Николаевич Петров санаатын маннык үллэстэр:
-- Уус Алдантан улуус баһылыгын солбуйааччыта Семен Бурнашев салайааччылаах дэлэгээссийэ буолан үлэлээтибит. Төгүрүк остуолларга долгутар боппуруостарбытын туруордубут, санаа атастастыбыт, миниистирдэри кытары атах тэпсэн олорон кэпсэттибит.
Сийиэс олус киэҥ бырагыраамалаах, элбэх боппуруоһу хабар төгүрүк остуоллардаах буолан астыннарда. Мин тус бэйэм олох-дьаһах хомунаалынай хаһаайыстыба боппуруостарыгар анаммыт төгүрүк остуолга кыттыыны ылан, нэһилиэгим кэтэх дьиэлэрин киин ититиигэ холбооһуҥҥа кэккэ ыйытыылары биэрдим. Маны сэргэ, инникитин бу тыын салааҕа үлэ торумун туоһуластым, атын улуустар баһылыктарын кытары үлэ уопутун атастастым.
Экэниэмикэ миниистирэ Петр Попов, тыа хаһаайыстыбатын миниистирин солбуйааччы, Уус Алдан улууһун куратора Анна Стручкова дэлэгээссийэбитин ыҥыран киэҥ кэпсэтиилэри ыыттылар, инвестиционнай бырайыактар уонна судаарыстыбаннай өйөбүл өттүгэр уларыйыылары сырдаттылар.
Сийиэс чэрчитинэн ыытыллыбыт бырабыыталыстыба чааһыгар Уус Алдан улууһун баһылыктарын аатыттан Бэрт Ууһун нэһилиэгин баһылыга Илья Ильин тыа сирин олоҕун тупсарыыга, үлэ-хамнас хаачыстыбатын үрдэтиигэ итиэннэ эдэр дьону төрөөбүт дойдуларыгар тахсан үлэлииллэрин ситиһэр үлэни ыытыыга этиилэри киллэрдэ.
-
0
-
0
-
0
-
0
-
0
-
0
