«Сэргэлээх уоттара» култуура киинигэр ассоциация 20 сыллаах үбүлүөйдээх пленарнай мунньаҕа ыытылынна. Бу улахан тэрилтэ 445 муниципальнай тэриллиини түмэр, сийиэстэрэ үс сылга биирдэ ыытыллар.
Дэлэгээттэр үс сыллааҕы үлэни түмүктүүр, муниципальнай реформаны дьүүлэһэр, инники үлэни торумнуур тэрээһиннэригэр Ил Дархан Айсен Николаев, Ил Түмэн бэрэссэдээтэлэ Алексей Еремеев кытыннылар итиэннэ эҕэрдэлээтилэр.
Баһылыктар инники кирбиигэ
Ил Дархан Айсен Николаев салайыы систиэмэтин “инники кирбиитинэн” олохтоох бэйэни салайыныы уорганнара буолалларын, бу туһунан дойдубут бэрэсидьиэнэ Вдадимир Путин эппитин санатта. Олохтоох бэйэни салайыныы систиэмэтигэр үлэлээбит киһи бу салааҕа эппиэтинэс ураты суолталааҕын билэрин, быһаарыныылартан дьон-сэргэ олоҕо быһаччы тутулуктааҕын эттэ.
Үүммүт 2026 сыл олохтоох бэйэни салайыныы реформатын ырытыыттан олоххо киириитин сыла буолар. Ол курдук, сыл аннараа өттүгэр 33-с №-дээх федеральнай сокуон олоххо киирбитэ, ол кэннэ өрөспүүбүлүкэтээҕи сокуон ылыллыбыта. Билигин турар сүрүн сорук – хас биирдии муниципалитет интэриэһин учуоттуур боломуочуйалары тыырыы.
Маны сэргэ, Ил Дархан Анал байыаннай дьайыы кыттыылаахтарын өйөөһүҥҥэ ураты болҕомтотун уурда. Кини санаппытынан, 6 улуус уонна 9 нэһилиэк баһылыктара АБДь кыттыылаахтара буолаллар. Байыастарга уонна кинилэр дьиэ кэргэттэригэр 1 млрд. солкуобайтан элбэх суумалаах өйөбүл миэрэтэ оҥорулунна. Инникитин даҕаны хас биирдии көмө баһылыктар тус хонтуруолларыгар туруохтааҕын, бюрократия өттүнэн харгыстар суох буолуохтаахтарын ыйда.
Муниципальнай сулууспалаахтарга быйыл от ыйын 1 күнүттэн хамнас 5,4% үрдүө. Маны сэргэ, бырабыыталыстыбаҕа сыл бүтүөр диэри үрдэтии өссө улаатарыгар быһаарыы ылыналларыгар, ол судаарыстыбаннай бүддьүөт бырайыагар ыйыллан өрөспүүбүлүкэ парламеныгар киириэхтээх диэн эттэ.
Боломуочуйалары тыырыы күүтэр
Ил Түмэн бэрэссэдээтэлэ Алексей Еремеев 33 №-дээх федеральнай сокуоҥҥа олоҕуран киирэр уларыйыыларга тохтоото. Ол курдук, олохтоох бэйэни салайыныы уорганнарыгар сүктэриллэр боломуочуйалар үбүлээһиннэригэр, улуус уонна нэһилиэк таһымнарыгар сөбүлэҥнэри түһэрсиигэ кэккэ боппуруостар баалларын ыйда. Судаарыстыбаннай Дуума кэмитиэтэ ыыппыт ырытыытыгар олоҕуран, 178 федеральнай сокуоҥҥа олохтоох салайыныы уорганнарыгар 1766 боломуочуйа сүктэриллибит. Онон бу сокуоннары саҥа ирдэбиллэргэ сөп түбэһиннэрэргэ сүҥкэн үлэ ыытыллара күүтүллэр.
Ил Түмэн федеральнай таһымҥа этиилэрдээх тахсыа: улуус уонна поселениелар таһымнарыгар боломуочуйалары биэрии быраабын олохтооһун, маны сэргэ бэрэстэбиитэллээх уорганнар үлэлэригэр аҕыйах ахсааннаах нэһилиэктэр уратыларын учуоттааһын тустарынан.
- Сахабыт Сиригэр икки таһымнаах систиэмэ уларыйбата, 445 муниципальнай тэриллии оннунан хаалыа. Ол эрээри, боломуочуйалары тыырыыга уустук үлэ күүтэр. Маныаха хас биирдии баһылык кыттара ирдэнэр, - диэн эттэ.
Сийиэс уурааҕа
Биэс күннээх сийиэс түмүгүнэн былаас уорганнарыгар үлэни торумнуур уураах ылылынна.
Бырабыыталыстыбаҕа сөмөлүөтүнэн уонна өрүс тырааныспарынан дьону таһыыга эбии үбүлээһини көрүү, күргэлэри тутуу, ОДьКХ ГУП тэрилтэҕэ өйөбүл былаанын ылыныы, «Ыраас уу» бырайыагы салҕааһын, АБДь кыттыылаахтарыгар уонна кинилэр дьиэ кэргэттэригэр бэриллэр сир учаастактарын инженернай ситимнэргэ холбооһун туһунан этилиннэ.
Ил Түмэҥҥэ муниципальнай сулууспалаахтарга эбии социальнай мэктиэлэри көрөллөрүгэр, биэнсийэҕэ көрүллэр эбии төлөбүрү олохтуурга муниципальнай ыстааһы 15 сылтан 12 сылга диэри намтатары эттилэр.
Резолюция биир улахан блогунан экология боппуруостара буоллулар. Улуустарга өртөөһүн бобуулааҕын туһунан иһитиннэриилэри күүһүрдүү, ойуур баһаарын утары оҥоһуллар быһыылары учуоттаан генеральнай былааннары саҥардыы, көҥүлэ суох сыбаалкалары суох оҥорууга бырагыраамалары ылыныы туруорулунна. Бырабыыталыстыбаҕа эрэгийиэммит килиимэтин учуоттаан, баһаар утары оҥоһуллар хаһыылары оҥоруу болдьоҕун уларытарга эттилэр, ол курдук ыам ыйын 1 күнүгэр диэри үлэ бүтүөхтээх диэн ирдэбил табыгаһа суох.
Сийиэс чэрчитинэн муниципальнай тэриллиилэр Сэбиэттэрин салайааччыларын саҥа састааба бигэргэннэ. Ассоциация салайааччыта Степан Саргыдаев баһылыктарга, дьокутааттарга, муниципальнай сулууспалаахтарга күннээҕи сыралаах үлэлэрин, дьоҥҥо амарах санааларын иһин махтанна.
Хаартыскалар: Василий Кононов, Ил Түмэн.
-
0
-
0
-
0
-
0
-
0
-
0
