Мунньахха экэниэмикэ миниистирэ Петр Попов, үпкэ миниистир э.т. Иван Алексеев, Арасыыйа баанын салаатын управляющайа Антон Коноплев, урбааҥҥа, атыыга-эргиэҥҥэ уонна туризмҥа миниистир Георгий Андреев, урбаанньыттар бырааптарын көмүскүүр боломуочуйалаах Альбина Кычкина, сыана бэлиитикэтин судаарыстыбаннай кэмитиэтин бэрэссэдээтэлэ Николай Бочков дакылааттары туруордулар.
Мунньахха Саха Өрөспүүбүлүкэтин 2036 сылга диэри социальнай-экэнэмиичэскэй сайдыытын (2050 сылга диэри көрүүлээх) стратегиятын саҥардыыны ырыттылар. Бу саҥардыылар федеральнай таһымнаах докумуоннарга уларыйыыларга олоҕуруохтара, уопсайа 35 сүрүн көрдөрүү (показатель) киириэ.
Быйыл, балаҕан ыйын 1 күнүттэн, дойдубут үрдүнэн “сыыппара харчы” диэн өйдөбүл олоххо киириэ. Бу харчы үһүс көрүҥэ буолар. Бу иннинэ уу харчы (наличнай) уонна тута харчыта суох (безналичнай) диэн өйдөбүллэр бааллара. Сыыппара харчыта Арассыыйа Баанын платформатыгар харайыллыа, атыы-эргиэн эрэ эпэрээссийэлэрэ оҥоһуллуо, кирэдьииттээһин уонна харайыыга бырыһыан көрүллүбэт.
Урбаан эйгэтигэр тыҥаан турар боппуруостары ырытыы ыытылынна. Ол курдук, муус устар 10 күнүнээҕи туругунан 47 тыһ. кыра уонна орто урбаан тэрилтэтэ баар, манна 136 тыһ.киһи үлэлиир. Онтон бэйэ дьарыктаахтар ахсааннара – 74 тыһыынчаны куоһарбыт.
Бүддьүөккэ эбии харчы киллэрии биир көрүҥэ -- туристааһын түһээнэ. Бу салаанан ааспыт сыл 14 улуус 16 мөл. солкуобай эбии дохуоттаммыт. Быйыл маҥнайгы кыбаартал түмүгүнэн көрдөрүү 5, 5 мөл. солкуобайга тэҥнэспит. Бу түһээн гостиницалартан ааҕыллар, толору олохтоох бүддьүөккэ киирэр. Ол эрээри, өрөспүүбүлүкэбитигэр 220 гостиница баарыттан 123 (55%) эрэ тустаах бэлиэтэниини ааспыт. Оттон түһээни төлүүр гостиницалар сертификацияны ааспыт буолуохтаахтар диэн эттилиннэ.
Урбаан өттүгэр саҥа өйөбүл миэрэлэр, бырагыраамалар, туруорсуулар тустарынан хаһыат кэлэр нүөмэригэр билсиэххитин сөп.
Хаартыска: Василий Кононов, Ил Түмэн.
-
0
-
0
-
0
-
0
-
0
-
0
