Мунньахха Бүлүү улууһун Лөкөчөөн нэһилиэгин баһылыга Анна Доргонова кыттыыны ылла. Кини норуот итэҕэлин ылан баһылыгынан үһүс болдьоҕун талыллан үлэлиир, эһиил эппиэтинэстээх үлэҕэ ыстааһа номнуо 15 сылын туолар. Анна Владимировнаттан сийиэс үлэтин туһунан санаатын атастаһарыгар көрдөстүм:
-- Олус улахан суолталаах, тыын боппуруостары быһаарсар, кыһалҕалары бииргэ ырытар тэрээһин буолан ааста. Сийиэскэ элбэх төгүрүк остуоллар ыытылыннылар, сэминээрдэр тэрилиннилэр.
Биһиги улууспутуттан 19 нэһилиэк баһылыктара, улууспут баһылыга, улуус дьокутааттарын сэбиэтин бэрэссэдээтэлэ буолан кэллибит.
Дойдубутугар буола турар балаһыанньаттан сиэттэрэн, үп-харчы өттүгэр күчүмэҕэйдэр бааллар эрээри, боломуочуйаларбытын толоробут.
Урукку сыллары кытары тэҥнээтэххэ уларыйыы элбэх эрээри, тыа сирин сайыннарыыга туһуламмыт болҕомто уҕараабат. Урукку сылларга “Тыа сирдэрин биир кэлим сайыннарыы бырагыраамата” үлэлиирэ, билигин ол оннугар тирэх нэһилиэнньэлээх пууннары сайыннарыы баар буолуо. Кыра нэһилиэнньэлээх, киинтэн ыраах сытар нэһилиэктэр маныаха долгуйабыт. Ол курдук, бу бырагырааманан сүрүннээн улуус кииннэрин уонна онтон 50 км тэйиэс сытар сирдэри сайыннарыыга, тупсарыыга үп көрүллүө диэн. Онон баһылыктар тэҥник сайдыыны туруорустубут.
Билигин кытыы нэһилиэктэртэн ыччат куораттарга, улуус кииннэригэр көһүүлэрэ бэлиэтэнэр. Дьиэ кэргэнинэн көһөн бараллар. Ол биир төрүөтэ - ипотеканан дьиэ атыылаһар кыахтаахтар. Иккиһэ - тыа сиригэр үлэ миэстэтин булар уустук. Нэһилиэк олохтоохторун орто саастара 50 сааска тэҥнэстэ. Ону тохторорго үлэ барара эрэйиллэр.
Маныаха, сийиэскэ этиллибитинэн, тыа хаһаайыстыбата сайдыахтаах. Биһиги нэһилиэкпитигэр улахан «Тускул» диэн бааһынай хаһаайыстыбалаахпыт. Былырыын аныгы оборудованиелаах, тупсаҕай тутуулаах сүөһү комплексын арыйбыппыт. Манна хотоннор, үлэһиттэр олорор дьиэлэрэ, тимир конструкциялартан таҥыллыбыт от харайар аныгы тутуу уонна да атын эбийиэктэр бааллар. Салайааччыта Афанасий Харлампьев. Кини уола Максим Афанасьевич «Туйгун-Ас» кэпэрэтиип салайааччыта буолар. Онон биһиги нэһилиэкптигэр тыа хаһаайыстыбатынан дьарыктаныы, сайыннарыы утумнанан салҕанар.
"Социальнай хантараактар" киирбиттэрэ олус үчүгэй. Эдэр ыччат кыттан араас салаанан дьарыктанан, эбии үптэнэн, үлэ миэстэтин тэрийэр кыахтанна. Нэһилиэкпититтэн инники сылларга сүөһү, быйыл сылгы иитэргэ эдэр ыаллар ыллылар.
Олохтоох көҕүлээһиннэри өйүүр бырагыраама нэһилиэк сайдыытыгар олус улахан суолталаах. Үбүлээһинэ өссө улаатарыгар баҕа санаабытын тиэрдэбит.
Ол да буоллар, өрөспүүбүлүкэбит бары муннугар төрүт салаабытыгар ыччат күүскэ, дьаныардаахтык ылсыбата долгутар. Маннык балаһыанньа биһиги өрөспүүбүлүкэбитигэр эрэ буолбакка, дойдубут үрдүнэн баар көстүү. Балаһыанньаны хайдах тосту уларытан, төрүт дьарыкпытын ыччаппытын сыһыарарбыт тула киэҥ кэпсэтии, ырытыы ыытыллан, этиилэр киирдилэр, аны олоххо киирэллэрин эрэнэбит.
Хаартыска ааптар түһэриитэ.
-
0
-
0
-
0
-
0
-
0
-
0
