Политика

Ойуур баһаардара

--Өрөспүүбүлүкэҕэ сайын саҕаланыаҕыттан 216 ойуур баһаара бэлиэтэннэ. Былырыын бу кэмҥэ 600 тыһ. га сир иэнигэр 770 баһаар баара бэлиэтэммитэ. Бу нэдиэлэҕэ мин Арассыыйатааҕы МЧС салалтатыттан БЕ-200 сөмөлүөттэри уонна МИ-26 бөртөлүөтү өрөспүүбүлүкэбитигэр ыытарга көрдөспүтүм. Былырыын РФ Бэрэсидьиэнигэр уонна Бырабыыталыстыбатыгар туһаайан эппиппит түмүгэр, ыксаллаах быһыы киритиэрийин быһаарарга улахан үлэ ыытыллыбыта. Билигин, уларыйыы киирбитин кэннэ, субъект иһигэр 2 уонна онтон элбэх муниципальнай оройуоҥҥа ыксаллаах быһыы биллэриллибит буоллаҕына, бүтүн эрэгийиэҥҥэ биллэриэхтэрин сөп. Саха Сирин үс улууһугар ыксаллаах быһыы-майгы биллэриллэн турар. Урут ыксаллаах быһыы буоллаҕына, бэйэбит кыахпытын таба туһанан, атын эрэгийиэннэртэн уонна Арассыыйатааҕы МЧС-тан күүстэри тардар этибит. Зондировщик сөмөлүөт үөскэтэр ардаҕа уонна былыта букатын буортута суох. Сөҥүүнү ыҥырыы - ойуур баһаарын уонна курааны сэрэтэр саамай эрэллээх ньыма буолар. Өрөспүүбүлүкэҕэ сотору Росгидромет зондировщик сөмөлүөтэ кэлэн, от уонна атырдьах ыйдарыгар үлэлиэҕэ, - диэн бэлиэтээтэ Ил Дархан.

Ил Дархан Донбаска сырыыта

--Дьоно олус көрсүө эбит. Арассыыйаҕа уонна Саха Сиригэр көмөбүтүн иһин махтаналлар. Кинилэр бары Арассыыйа улахан патриоттара буолаллар. Бу дьон олохторо тупсарын туһугар барытын гыныахтара. Кинилэргэ көмөлөһүөххэ наада. Биһиги кинилэргэ оскуолалары, дьиэлэри, уулуссалары өрөмүөннээн көмөлөһүөхпүт. Экэниэмикэ эйгэтигэр үлэлэһиэхпит. Сибээспитин сайыннарарга элбэх кыахтаахпыт.

Ил Дархан соторутааҕыта буолбут сөмөлүөт саахалларын туһунан .

-Хомойуох иһин, өрөспүүбүлүкэҕэ сөмөлүөттэр саахаллара буолла.. АН-2 сөмөлүөт сууллубутугар, олохтон туораабыт дьон аймахтарыгар, чугас дьонугар дириҥ кутурҕаммын тиэрдэбин. Хата, биир киһи тыыннаах хаалбыт, кини эмтэнэ сылдьар. Хас биирдии түбэлтэҕэ хамыыһыйа тэрилиннэ, олор үлэлэрэ биир ыйынан биллиэҕэ. Биһиги сорукпут - көтүү куттала суох буолуутун хааччыйыы.

Цифровой тэҥэ суох буолууну туоратыы

-3 сыл иһигэр Аартыка улуустарын кииннэригэр уонна ыраах сытар нэһилиэнньэлээх пууннарыгар оптоволокно киириэхтээх. РФ Цифровой сайдыыга министиэристибэтэ уопсай суума 50%-ын үбүлүөх буолла. Барыта сатаннаҕына, бырайыак эһиилгиттэн үлэтин саҕалыаҕа.

Айыы Кыһатыгар үөрэнии

-Айыы Кыһата  --  биир бастыҥ оскуолабыт.   203-с микрооройуоҥҥа прописката суох олорор дьон оҕолорун бу оскуолаҕа үөрэттэрэ биэрэр кыахтара суоҕа биллэр. Куорат дьаһалтата сөптөөх быһаарыныыны ылыныа диэн эрэнэбин. Ол эрээри, бу боппуруоһу наһаа үлүннэрэр наадата суох.  Бу кыһалҕа быһаарыллыаҕа. 

Намныыр суол

-- Марха бөһүөлэгиттэн аэропорка диэри суолу кэҥэтии чугастааҕы сылларга түмүктэниэҕэ. Быйыл балаҕан ыйыгар диэри Тулагыттан Объездной трассаҕа диэри өрөмүөн үлэтэ үмүрүйүөҕэ. Аэропорт-Жатай туһаайыытын диэки баар учаастагы кэҥэтии икки сыл иһинэн, 2024 сылга диэри, бүтүөҕэ. 

Оскуола тутуута

-4 №-дээх коррекционнай оскуола саҥа дьиэтин тутуутун бырайыактыыр үлэтэ бара турар. Тутуу хайаан да саҕаланыаҕа уонна 2024 сыл бүтүөр диэри түмүктэниэҕэ.

Паром сырыыта 

-Билигин паромнар суукканы толору кэриэтэ тохтообокко үлэлииллэр. Биллэн турар, сырыы элбэҕиттэн сылтаан уочараттар үөскүүллэр. Ону суох оҥорууга сөптөөх болҕомто ууруллуоҕа.

Биир кэлим эксээмэн

--Быйылгы курдук, эһиил ЕГЭ-ҕэ 100-түү баалы ылбыт оҕолорго 100-түү тыһ. солк  биэрэри көрүөхпүт. Дьиҥэр, бу сөптөөх көмө, идиэйэ буолар. Талааннаах, дьоҕурдаах оҕолору өйүөх тустаахпыт.

Спортивнай оонньуулар 

--Саха Сирин норуоттарын оонньууларыгар суолга быылы суох гынар үлэлэр булгуччу ыытыллыахтара.

Сайсары күөл

-Сайсары күөлү тупсарыы бырагырааматынан хас даҕаны сынньанар зона тутуллуоҕа уонна күөл тула хаамар, бэлисипиэттиир ыллыктар оҥоһуллуохтара.

Хаарбах дьиэ

-Саахалланар туруктаах эргэ дьиэлэртэн көһөрүү бырагыраамата дойду үрдүнэн үлэлиир. Битиимҥэ бу үлэ хаачыстыбата суохтук ыытыллыбыта. Эһиил өссө элбэх мас дьиэ бу бырагыраамаҕа киирэн, дьон саҥа дьиэлэниэхтээх.

Учуутал бульвара

-Учуутал бульварын тупсаҕай гына оҥоруу барыаҕа. Санатар буоллахха, бульвар куорат дьаһалтатын көрүүтүгэр бэриллибитэ. Кэлэр сылга тустаах үлэ ыытыллыаҕа диэн эрэнэбин. Итиннэ умайбыт уонна эргэ дьиэлэр турбуттара. Бульвар оҥоһуллубута саамай сөп. Ол эрээри, ону тиһэҕэр тиэрдэр курдук үчүгэйдик оҥоруохха наада. Атын муниципалитеттарга да көрдөххө, кырасыабай миэстэлээх сирдэр-уоттар көрүүтэ суох тураллара баар суол. Итинник сирдэри-уоттары көрөр-истэр муниципалитеттар эбээһинэстэрэ буолар.