Издательский дом Редакция Подписка
Погода в Якутске: . -12 oC

Абый улууһун Уолбут нэһилиэгэ уруккута чулуу үлэһиттэрдээх нэһилиэгинэн биллэр. Манна килбиэннээх үлэлэринэн Абыйы аатырдыбыт үтүө үлэһит дьон олорон ааспыттара.

Абый улууһун Уолбут нэһилиэгэ уруккута чулуу үлэһиттэрдээх нэһилиэгинэн биллэр. Манна килбиэннээх үлэлэринэн Абыйы аатырдыбыт үтүө үлэһит дьон олорон ааспыттара.

Ол курдук, уолбуттар холобур оҥостор дьонноро – булчуттар, ыанньыксыттар, хара саһылы иитээччилэр: Үлэ Кыһыл Знамята уордьан кавалера Дохунаев Дмитрий Федотович, «Бочуот Знага» уордьанынан наҕараадаламмыт Жирков Михаил Перфильевич, «Бочуот Знага» уордьан кавалера Новикова Евдокия Перфильевна, Үлэ КыҺыл Знамята, «Бочуот знага» уордьаннар кавалердара Новиков Василий Павлович, «Норуоттар доҕордоһуулара» уордьан кавалера Жиркова Анна Михайловна, «Рекордсмены XX столетия» республика кинигэтигэр киирбит Корякин Дмитрий Дмитриевич уо.д.а. Күүрүүлээх үлэ кэмин дьоруойдара!

Билигин Уолбут нэһилиэгэр, ханна да буоларын курдук, сүөһү иитэр киһи аҕыйах. Ыалларынан ылан көрдөххө, 5 хаһаайыстыба ынах сүөһүһээх. Ыччат сүөһү иитиититтэн тэйдэ.

Эдэр саастарыттан илиилэрин араарбакка ынах сүөһүнү элбэтэр соруктаах Федоровтар дьиэ кэргэн үлэлииллэр. Биир ынахтан саҕалаан билигин 12 сүөһүлээхтэр, олортон 5-һэ ыанар ынах. «1986 с. тыһаҕас атыыласпыппыт. Онтон ыла сүөһүнү эспэккэ ииттэбит. Ахсаанын элбэтэн баран, аҕыйата сылдьыбыт кэмнээхпит, - диэн ыал ийэтэ Анна Михайловна кэпсэтиибитин саҕалыыр. – Быйылгы кыстык этэҥҥэ ааһан эрэр. Ынахтарбыт кулун тутарга төрүөхтээхтэр. Төрүүр ынах биэс. Икки эһиил төрүүр. Уопсайа 12 ынах сүөһүнү кыстатан турабыт. Өссө да элбэтэр былааннаахпыт. Хотоммут эргэ, кыра. Саҥа хотон туттуохпутун баҕарабыт».

Федоровтар бэйлэрэ бас билэр 15 гаалаах оттуур ходуһалаахтар. Бөһүөлэктэн чугас. Быйыл ардахтаах дьыл буолан, от бэлэмнээһинигэр сүөһүлээхтэр ыарахаттары көрсүбүттэрэ. Федоровтар кыстыыр отторун 25 т. оттообуттар. 30 куул комбикорм атыыласпыттар.

Олохтоох дьаһалта сүөһү ииттэр дьоҥҥо усулуобуйа тэрийэн, сайаапканан комбикорму тиэйэн аҕалар, тиэйиитин ороскуотун уйунар эбит. Ыал ийэтэ түгэнинэн туһанан олохтоох дьаһалтаҕа махтанар.

Өссө уонча сыллааҕыта Анна Михайловна техника ылынаары кирэдьиит ыла Дьокуускайга көтөрүн өйдүүбүн. Ол саҕана ирдэбил кытаанах буолара. Улууска баан кирэдьиит биэрбэтэ. Соннук кыайан ылбатах эбит. Билигин, хата, МТЗ-82 тыраахтардаах. «Кэргэним тиэхиньикэҕэ сыһыаннаах буолан, хаалбыт техниканы мунньан бэйэтэ оҥостубут тыраахтара», - диэн ситэрэн биэрэр Анна. Аны туран 2010 с. нэһилиэк дьаһалтата роторнай косилка ылалларыгар көмөлөспүт.

- Бэйэбит күүспүтүнэн сүөһүбүтүн өссө да элбэтэр былааннаахпыт. Бааһынай хаһаайыстыбалаах урбаанньыт диэммит. Онон тыа хаһаайыстыбатын линиятынан граҥҥа эҥин кыайан киирсибэппит. Судаарыстыба ыанар ынах төбөтүгэр 45 тыһ. солк. субсидия биэрэн көмөлөһөр. Биһиги усулуобуйабытыгар субсидия төбөҕө бэриллэрэ саамай сөп. Үүт, сүөгэй ынахтарбыт төрөөтүлэр да дэлэйиэ. Наадыйар дьон элбэх. Белай Гораҕа да ыытабыт.

Сүөһүнү сатаан иитиэххэ, кинилэргэ киһилии сыһыаннаһан, «бу - мин баайым» диэн өйгөр-санааҕар киллэрэр наада, - диэн санаатын үллэһиннэ.

Аны хоту улуустарга түргэнник ситэр тыа хаһаайыстбатын салаатын сайыннарар сорук турарынан, улуустан онно сайаапка хомуйбуттар. Федоровтар онно эмиэ кыттыспыттар. «Сибиинньэ оҕотун ыларга сайаапкаластыбыт. Сибиинньэни иитэн элбэтэр биһиги усулуобуйабытыгар ыарахан. Эт оҥостоору саас эрдэ ылан баран, күһүн идэһэ оҥостоору ылабыт», - диир.

Бэйэ бородууксуйатынан хааччынарга оҕуруот аһа эмиэ наада. Федоровтар хортуоска олордон бэйэлэрин хааччыналлар. Ордугунан дохуот оҥостоллор.

Кэргэнэ Юрий Никонорович эмиэ илиитин үлэттэн араарбат үлэһит. Ылсыбытын тиһэҕэр тириэрдэр, сатаабата диэн суох. Билигин бочуоттаах сынньалаҥҥа олорор.

Аннаны тыа дьахтарын иннэ-кэннэ биллибэт элбэх үлэтиттэн быыс булан нэһилиэк уопсастыбаннай олоҕуттан туора турбатын сөҕөбүн. Култуура ыытар тэрээһиннэрин көхтөөх кыттааччыта кини. Спортсменка, күрэхтэһиилэри көтүппэт.

Бу курдук үлэттэн куттаммат тыа ыала бары салааны боруобалаан, сайыннаран, бэйэ аһынан-үөлүнэн толору хааччынар, эбии дохуоттанар. Дьиэ кэргэн дьарыктаах.

Уолбут нэһилиэгин дьаһалтата тыа хаһаайыстыбатынан дьарыктанар олохтоохторун өйүүрүн хайҕыахха эрэ сөп. Улуус, нэһилиэк баһылыктара тыа хаһаайыстыбатыгар чугаһыыллара наада. Сүөһү, сылгы, таба иитиитэ, тыа хаһаайыстыбатын бородууксуйатын оҥоруу салалта болҕомтотун киинигэр турдаҕына, ситимнээх үлэ ыытылыннаҕына олохтоох бородууксуйанан хааччынар кыахтар улам баар буолан иһиэхтэрэ буоллаҕа.

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением