Бу учаастак бөһүөлэктэн 3 көстөөх сиргэ баар. Урут-уруккуттан манна төрүү илик ынах сүөһүнү сайылаталлар. Салайааччынан 33-с сылын таһаарыылаахтык үлэлиир тыа хаһаайыстыбатын үлэтин бэтэрээнэ Винокуров Сергей Егорович. Кини дьаһаллаах салалтатынан, сылын аайы оскуолабыт 2 үөрэнээччитин көмөлөһүннэрэ илдьэн сайылатар, үлэҕэ үөрэтэр.
Оҕолор сайыммыт саамай бырдахтаах кэмигэр сүөһүнү хаһааҕа сөрүүкэтэллэр, түптэлииллэр, уулаталлар, хаһааны ыраастыыллар. Сыһыыга сылдьарга сысталлар, хара үлэҕэ үөрэнэллэр.
Ванялаах Коля бу сайын 79 төбө сүөһүнү сайылаппыттар. Ваня былырыыҥҥыттан сылдьар буолан үөрүйэх, оттон Коля быйыл саҥа сылдьыбыт да буоллар, сырыытын олус астыммыт. Элбэххэ үөрэммит, элбэҕи билбит-көрбүт.
Кырдьаҕас салайааччыларын мындыр сүбэтин ылынан, туһанан, оҕолор сайыҥҥы түбүктээх үлэлэрэ этэҥҥэ ааспыт. Онон уолаттар сотору дуогабардаспыт хамнастарын ылан үөрүөхтэрэ. Маны таһынан, эттиин-хаанныын, өйдүүн-санаалыын үлэлээн улааппыттара саарбаҕа суох.
Винокурова Нарыяна
Орто Халыма, Өлөөкө Күөл б.
- 0
- 0
- 0
- 0
- 0
- 0