Бу туһунан СӨ киин быыбардыыр хамыыһыйа пресс-сулууспата иһитиннэрэр. Ити курдук, быыбар дьайыыларын болдьоҕо үс гыммыт биирин чиэппэргэ кылгатылынна.
Санатар буоллахха, Үөһээ Бүлүү улууһун мунньаҕын дьокутааттара бары биир киһи курдук олунньу 4 күнүгэр боломуочуйаларын устуммуттара. Атыннык эттэххэ, Үөһээ Бүлүү улууһун бэрэстэбиитэллээх уоргана бэйэтинэн дьокутааттарын дуоһунастарыттан босхолообута. Улуус дьокутааттара 2018 с. балаҕан ыйыгар талыллыбыттара, ол эбэтэр болдьохторо бүтүөр диэри — 2023 с. балаҕан ыйыгар диэри, өссө балтараа сыл үлэлииллэрэ ирдэнэрэ.
Бу иннинэ Үөһээ Бүлүү улууһун баһылыга Владимир Поскачин “Аһаҕас былаас ситимигэр олохтоох бэйэни салайыныы уопсай бириинсиптэрин туһунан” диэн федеральнай сокуон барылын дьүүллэһиигэ баһылыктар быыбарынан талыллалларын оннунан хаалларарга этии киллэрбитэ.
СӨ Киин быыбардыыр хамыыһыйа 2022 с. тохсунньу 1 күнүнээҕи дааннайынан, Үөһээ Бүлүү улууһун быыбардааччытын ахсаана - 12972 киһи.
Биллиилээх бэлиитик, Өрөспүүбүлүкэтээҕи лиссиэй-интэринээт дириэктэрэ Иван Шамаев социальнай ситимнэринэн биир дойдулаахтарын хамсаныыларын быһааран этиитигэр, өрөспүүбүлүкэ атын улуустарын уонна оройуоннарын дьокутааттара “үөһээ бүлүүлэр суолларын“ холобур оҥостон батыһыахтарын наада диэн суруйбута. Оччотугар өрөспүүбүлүкэҕэ бу сокуон үлэҕэ киириэҕэр диэри аны биэс сылга болдьоххо тохтобул көрүллэрэ сабаҕаланар.
Олохтоох былаас уорганнарын реформатын туһунан федеральнай сокуон барыла салгыы бу сыл олунньу 23 күнүгэр диэри эрэгийиэннэринэн дьүүллэһиллэр.
-
0
-
0
-
0
-
0
-
0
-
0
