Бэҕэһээ СӨ Бырабыыталыстыбатын бэрэссэдээтэлин солбуйааччы эбээһинэһин толорооччу Михаил Никифоров уонна СӨ тыатын хаһаайыстыбатын миниистирэ Александр Атласов Сунтаар улууһугар оробуочай сырыыларыгар Күндэйэ нэһилиэгэр сылдьан, «Сырдык Аартык» кэпэрэтиип (салайааччы Иванова Р.А.) убойнай уонна аһы астыыр сыахтарын тутуутун хаамыытын кытары билистилэр. «Ньэккэй» сайылыгар сылдьан үлэһиттэри кытта кэпсэттилэр. Манна үлэһиттэр олороллоругар 3 саҥа дьиэ тутуллубут. Ол кэннэ Кутанаҕа тиийэн бу соторутааҕыта үлэҕэ киирбит уу ситимин үлэтин көрдүлэр.
Сырыыларын түмүгэр Күүкэй нэһилиэгэр тахсан, Күүкэй күөлүгэр баар шлюз-регуляторы көрдүлэр. Нэһилиэккэ бэйэтигэр Саха Өрөспүүбүлүкэтэ төрүттэммитэ 100 сылыгар аналлаах «Албан аат ыллыга» искибиэр аһыллар үөрүүлээх тэрээһинигэр кытыннылар. Киирии тылы Арассыыйа Федерациятын Сэбиэтин чилиэнэ Александр Акимов эттэ.
Кини дьоро түгэҥҥэ Күүкэй нэһилиэгин бастакы старостата, нэһилиэк Бочуоттаах инородеһа, мецената, атыыһыта Никита Афанасьевич Самсонов уонна СӨ НА академига, экэнэмиичэскэй наука дуоктара, профессор, РФ наукатын үтүөлээх диэйэтэлэ, Бочуот уордьан кавалера, СӨ Наукаҕа уонна тиэхиньикэҕэ Судаарыстыбаннай бириэмийэтин лауреата Егор Григорьевич Егоров олохторун туһунан сиһилии кэпсээтэ. Егор Григорьевиһы кытта алтыһан ааспыт түгэннэрин туһунан үллэһиннэ. Ол кэннэ кыһыл лиэнтэни кырыйан, икки бүүһү арыйдылар.
Үөрүүлээх тэрээһиҥҥэ Никита Самсонов сиэнэ Александр Самсонов уонна Егор Егоров төрөппүт уола Сергей Егоровкэргэнинээн кэлэн кыттыбыттара олус долгутуулаах буолла.
Салгыы күндү ыалдьыттар Н.А.Самсонов аатынан духуобунай-үөрэтэр кииҥҥэ Е.Г.Егоров олоҕун, үлэтин туһунан кинигэ сүрэхтэниитигэр сырыттылар. Тэрээһини Күүкэй бибилэтиэкэтин сэбиэдиссэйэ Ньургуйаана Львова ыытта. Кинигэ Дьокуускай куоракка «Сайдам» кинигэ кыһатыгар 500 ахсаанынан тахсыбыт.
Ити күн Михаил Никифоров, Александр Атласов Ньурбаҕа бардылар.
-
0
-
0
-
0
-
0
-
0
-
0
