Күhүҥҥү сылаас нуhараҥ күн, киэhээ 17 чааска, Дьокуускай куорат Доҕордоhуу болуоссатыгар дьон-сэргэ тоҕуоруста. Кинилэр ѳрѳгѳйдѳѳх церемонияҕа Айсен Николаев кэргэнинээн кэлбиттэрин уруйдуу-айхаллыы кѳрүстүлэр.
Үгэс быhыытынан, Баhылык инаугурацията Д.К. Сивцев-Суорун Омоллоон аатынан опера уонна балет тыйаатырыгар ыытылынна. Онно ыҥырыылаах ыалдьыттар — бырабыыталыстыба чилиэннэрэ, норуот дьокутааттара, оройуоннар баhылыктара, бѳдѳҥ тэрилтэлэр салайааччылара, Ытык сүбэ старейшиналара, бэтэрээннэр, кѳхтѳѳх ыччат кытыннылар.
Инаугурация церемонията тыйаатыр сыанатыгар Арассыыйа, Саха Сирин судаарыстыбаннай былаахтарын уонна Саха Сирин Конституциятын кинигэтин киллэрииттэн саҕаланна. Саха Сирин Киин быыбардыыр хамыыhыйатын бэрэссэдээтэлэ Евгений Федоров быыбар официальнай түмүктэрин иhитиннэрдэ. Айсен Николаевка Саха Ѳрѳспүүбүлүкэтин Баhылыгынан талыллыбытын туhунан дастабырыанньаны туттарда. Ол курдук, балаҕан ыйын 8-10 күннэригэр буолбут быыбар түмүгүнэн Айсен Николаев иккис болдьоххо Саха Сирин Баhылыгынан талыллыбыта. Киниэхэ быыбардааччылар 75,77% бэйэлэрин куоластарын биэрбиттэрэ.
Салгыы Айсен Николаев, Саха Ѳрѳспүүбүлүкэтин Конституциятыгар уҥа илиитин ууран туран, нууччалыы уонна сахалыы тылынан бирисээгэни эттэ. Ол онон кини Саха Сирин Баhылыгын быhыытынан бэйэтин эбээhинэстэрин үтүѳ суобастаахтык толорорго, Арассыыйа Федерациятын уонна эрэгийиэн сокуоннарын тутуhарга, ѳрѳспүүбүлүкэ национальнай-судаарыстыбаннай статуhун уонна кини элбэх омуктаах норуотун кѳмүскүүргэ, киhи уонна гражданин бырааптарын ытыктыырга андаҕайда.
«Мин билигин Саха Ѳрѳспүүбүлүкэтин Баhылыгын церемонияҕа кэтиллэр бэлиэтин кэтэн турабын. Ону миэхэ биэс сыллааҕыта биhиги Бастакы Бэрэсидьиэммит Михаил Ефимович Николаев туттарбыта. Бу миэхэ Михаил Ефимович биэрбит эстафетатын утумнааhын символа. Миэхэ кини олоҕун бүтүннүү анаабыт дьыалатын салгыырга улахан эппиэтинэс сүктэриллэр», - диэтэ кини.
Мантан салгыы Доҕордоhуу болуоссатыгар тахсан, Айсен Николаев мустубут дьоҥҥо туhаайан: «Күндү Сахам Сирин олохтоохторо! Бар дьонум! Эhигини Саха Ѳрѳспүүбүлүкэтин Судаарыстыбаннаhын күнүнэн истиҥник эҕэрдэлиибин! Миэхэ итэҕэйэн, иккис болдьоххо талбыккытыгар ис сүрэхпиттэн махтанабын! Бу миэхэ улахан чиэс уонна биhиги Сахабыт Сирин туhугар ыытар үлэбитин улахан сыаналааhын», — диэн эттэ.
Үѳрүүлээх тэрээhин түмүгэр элбэх киhилээх Добун оhуохай түhүлгэтэ тардылынна.
-
0
-
0
-
0
-
0
-
0
-
0
