1993 сыллаахха бастакы бэрэсидьиэн Михаил Николаев көҕүлээһининэн Өрөспүүбүлүкэтээҕи мэдэссиинэ национальнай киинэ олохтоммута. Киин иһинэн кардиохирургия отделениета арыллыбыта. Олохтоох дьон өрөспүүбүлүкэ таһыгар эмтэнэ, эпэрээссийэлэнэ барар эбит буоллахтарына, Киин аһыллан тэтимнээхтик үлэлиэҕиттэн үгүс дьон маннык кыһалҕаны көрсүбэт буолбуттара. Биир улахан ситиһии -- 2000 сыл сэтинньитигэр кардиохирургияҕа сүрэххэ аан бастакы эпэрээссийэ оҥоһуллубута. Онтон ыла олохтоох хирург быраастар сылга 500-чэкэ эпэрээссийэни оҥорор буолбуттара. Оттон 2018 сыллаахха Саха сирин доруобуйаҕа харыстабылын историятыгар улахан бэлиэ түгэн тосхойбута – ыарыһахха атын киһи сүрэҕин олордубуттара, ол эпэрээссийэ этэҥҥэ ааспыта.
Мин бүгүн эпэрээссийэ оҥоһуутугар биир саамай тутаах исписиэлис-быраас туһунан суруйуохпун баҕарабын. Оннук бырааһынан анестезиолог буолар.
Алквиад Валентинович Булатов 2012 сылтан 1№-дээх Өрөспүүбүлүкэтээҕи – Мэдэссиинэ национальнай киин анестезиология, реанимация уонна интенсивнай терапия отделениятын сэбиэдиссэйинэн үлэлиир. Кини СГУ мэдиссиинискэй институтун бүтэрэн баран ординатуратын Бакулевскай институтка Москва куоракка ааспыта. Аспирантураҕа киирэн, ситиһиилээхтик бүтэрэн, мэдэссиинэ наукатын кандидатынан буолбута. 2008-2012 сылларга Бакулевскай кардиологическай кииҥҥэ анестезиологынан үлэлээбитэ.
“Мин дойдубар, Саха сиригэр төннөбүн диэн эрдэттэн былааннаах этим. Мэдиссиинэ киинигэр отделение сэбиэдиссэйин үлэтигэр ыҥырбыттарыгар тута сөбүлэспитим. Киин сиргэ билиибин хаҥатан, уопутуран кэлэн, үлэбэр төбөм оройунан түспүтүм. Биһиги, анестезиологтар үлэбит – дьон эпэрээссийэни доруобуйаларыгар охсуута суох аһаралларын ситиһии буолар. Эпэрээссийэҕэ бэлэмниибит, эпэрээссийэттэн тахсарыгар көмөлөһөбүт. Нууччалыы эттэххэ, “протезирование жизненно важных функций – дыхание, сердечный ритм”, -- диэн кини үлэтин туһунан билиһиннэрэр.
Кардиохирургия отделениетыгар аһаҕас сүрэххэ эпэрээссийэ, кардиостимуляторы тутуоруу, кыараабыт сүрэх тымырдарынан хаан сүүрэрин хааччыйар стент туруоруу, сүрэх тэбэр тэтимэ кэһиллибитин чөлүгэр түһэрии уонна да атын эпэрээссийэлэри, эмтээһиннэри оҥороллор. Маныаха анестезиолог үлэтэ муҥура суох элбэх уонна эппиэтинэстээх. Үлэлэрэ биир да чаас тохтообот. Сууккаҕа баар 24 чааска кинилэр барытыгар бэлэм буолуохтаахтар.
Алквиад Валентинович уонна кини кэллиэгэлэрэ сылын аайы квалификацияларын үрдэтинэр үөрэҕи бараллар. “Холобура, 3 нэдиэлэлээх уорганнары трансплантациялааһын хайысхатынан үөрэммиппит. 5 сыл буола-буола квалификацияны үрдэтии циклын ааһабыт. Мэдиссиинэ биир саамай түргэнник сайдар эйгэ буолар. Түргэн тэтимнээх аныгы олоххо биһиги салаабыт сүнньүнэн араас саҥалыы уопуттар киирэллэр. Онон биир таһымҥа сылдьарбыт табыллыбат”, -- диир кини.
Мин Алквиад Валентиновичка идэлээх бырааһынньыгынан бары ситиһиилэри баҕардым, Саха сирин мэдэссиинэтин салаатыгар бу курдук патриот эдэр дьон баалларын көрөн, киһи үөрэр, инникигэ эрэл күүһүрэр.
-
0
-
0
-
0
-
0
-
0
-
0
