Өксөкүлээх Өлөксөй аатынан оскуола үөрэнээччилэрэ уонна учууталлар Алампа олорбут Куобах Буһарбыт, Оккуодай алаастарыгар тахса сырыттылар.
Нэһилиэк бэтэрээннэрин сэбиэтин бэрэссэдээтэлэ М.Л.Архипов ахтыы оҥордо.1986 сыллаахха Николай Слепцов уонна Егор Посельскай туруорбут бэлиэлэрин, сэргэни, оскуола учууталлара быйыл туппут беседкаларын көрдүлэр. Бэтэрээн учуутал С.К. Архипова аал уоту аһатта, дьоро күнүнэн алгыс эттэ.
Кулуупка Дьохсоҕон нэһилиэгин дьаһалтата олохтообут “Үрүҥ туллук” бэлиэни туттарар тэрээһин буолла.
--Алаас уола Алампа аатын үйэтитиигэ үлэлэһэр дьоммутун, Дьохсоҕон нэһилиэгин олохтоохторун, бу үбүлүөйдээх сылынан чиэстээтибит. Ол курдук, 13 киһиэхэ үрүҥ көмүстэн оҥоһуллубут “Үрүҥ туллук” диэн бэлиэни туттардыбыт: Михаил Лукич уонна Светлана Климентьевна Архиповтарга, Татьяна Львовна Поповаҕа, Галина Егоровна Арылаховаҕа, Варвара Федосеевна Колотинскаяҕа, Иван Михайлович Бочониҥҥа, Галина Константиновна Давыдоваҕа, Галина Николаевна Другинаҕа, Мария Владимировна Сивцеваҕа, Лариса Михайловна Саввинаҕа, Тамара Ивановна Татариноваҕа, Изабелла Семеновна Жараеваҕа, Ньургуйаана Михайловна Лебедеваҕа. Бу бэлиэни 5 сыл буола-буола туттарыахпыт. Учууталлар Е.В.Лебедев, Р.Р. Чомчоев, П.Е.Кириллин,Л.А. Попова Бочуоттаах грамотанан наҕараадаланнылар,-- диир Дьохсоҕон нэһилиэгин баһылыга Петр Захаров.
Сэтинньи 14 күнүгэр Ытык Күөл Хадаайы мусуойугар баар А.И.Софронов-Алампа уҥуоҕар суруйааччы 135 сылынан сүгүрүйүү сиэрэ-туома ыытылынна.
--Алампа саха литературатын төрүттэспит суруйааччы, поэзияҕа нарын лириканы бастакынан киллэрбит поэт, бастакы драматург, сахалыы бастакы "Манчаары" диэн хаһыаты таһаарбыт редактор, "Чолбон" сурунаалы олохтообута, Саха драматическай тыйаатырын тэрийбитэ уонна салайбыта, үгүс элбэх бырабыыталыстыбаннай хамыыһыйаҕа үлэлээбит улахан өҥөлөөх киһи буолар.
Алампа уҥуоҕар сибэкки дьөрбөтүн уурууга Таатта улууһун баһылыгын солбуйааччы И.А.Сивцева, улуустааҕы норуот айымньытын дьиэтин дириэктэрэ Г.Г.Вырдылин, Боробул сэлиэнньэтин 89 сааһыгар сылдьар кырдьаҕаһа, “Алампа, Алампа” пьесаны суруйан, куонкуруска кыайбыт И.М.Бочонин, Өксөкүлээх Өлөксөй аатынан оскуола дириэктэрэ В.Д.Петрова, үөрэх управлениетын начаалынньыгын солбуйааччы М.Н.Луковцева уонна мин тыл эттибит. Дьохсоҕонтон "Куорсун" литературнай түмсүү чилиэннэрэ Алампа туһунан хоһооннорун аахтылар, -- диэн тэрээһини сырдатар Дьохсоҕон нэһилиэгин бэтэрээннэрин сэбиэтин бэрэссэдээтэлэ Михаил Архипов.
Сарсын дьохсоҕоттор 1996 сыллаахха Алампа 110 сылынан ыытыллыбыт үбүлүөйдээх тэрээһин видеотун көрүөхтэрэ.
- 0
- 0
- 0
- 0
- 0
- 0