Саха сиригэр борокуратуура 1922 сыллаахха баар буолбута. Онон эмиэ үбүлүөйдээх сыла. 100 сыл тухары өрөспүүбүлүкэбитигэр бэрээдэги араҥаччылаан, быраап өттүнэн бигэ буоларбытын хааччыйан, сокуону тутуһууну хонтуруоллаан, олохтоохтор көҥүллэрин күөмчүлээбэттэрин көрөн-истэн, мииссийэтин бэркэ толорон кэллэ.
Өрөспүүбүлүкэ борокуратууратын аппараатыгар, оройуоннарга уонна куораттарга, айылҕа харыстабылыгар, хаайыыга барыта 300 киһи үлэлии сылдьар.
Ил Түмэн СӨ Борокуратууратын кытта сокуону оҥорууга бииргэ үлэлэһэр туһунан Сөбүлэҥи 2005 сыл ыам ыйын 16 күнүгэр баттаспыта. Онтон бу соторутааҕыта, 2021 сыл ахсынньы 21 күнүгэр, ону саҥардан, иккис Сөбүлэҥи түһэрсибиттэрэ – аһаҕас былаас тиһигэр конституционнай уларыйыылары киллэриигэ ыкса ситимнээх үлэни ыытарга туһаайан.
Тохсунньу 12 күнүгэр РФ Борокуратууратын үлэһитин күнүнэн, итиэннэ үбүлүөйдээх 300 сылынан, Ил Түмэн аактабай саалатыгар наҕараадалааһын буолла.
Үөрүүлээх тэрээһиҥҥэ СӨ борокуруорун э.т. Александр Трухин кыттыыны ылла. Кини борокуратуура үлэһиттэрэ диэн үрдүк таһымнаах юристар буолалларын, судаарыстыба халбаҥнаабат көнө сүрүнүн тутарга, бэрээдэги олохтуурга, сокуону тутуһарга улахан суолталаахтарын бэлиэтээтэ.
Ил Түмэн судаарыстыбаннай тутулга уонна олохтоох салайыныыга сис кэмитиэтин бэрэссэдээтэлэ Владаимир Прокопьев Судаарыстыбаннай Мунньах спикерэ Алексей Еремеев эҕэрдэ суругун аахта. Алексей Ильич бу күннэргэ Москубаҕа, Ил Дархан Айсен Николаевтыын РФ Федеральнай Мунньаҕын Федерацияҕа Сэбиэтин бэрэссэдээтэлэ Валентина Матвиенкоҕа сылдьан, өрөспүүбүлүкэ үбүлүөйдээх сылга ситиһиитин, былаанын, Өлүөнэ муостатын тутуу туһунан кэпсэттилэр.
Алексей Еремеев эҕэрдэ суругар этиллэр: “Национальнай бырайыактары олоххо, сокуоҥҥа уларытыылары киллэрэргэ борокуратуура өттүттэн көрүү-истии булгуччулаах. Кинилэр ыйыыларынан-кэрдиилэринэн демократическай-правовай судаарыстыбаны түстүүбүт. Бэрээдэги хонтуруоллааһыҥҥа, коррупцияны утары охсуһууга, гражданнар бырааптарын көмүскээһиҥҥэ, биир сомоҕо правовой эйгэни олохтуурга борокуратуура суолтата сүҥкэн” диэн.
Оттон Владимир Михайлович борокуратуура толоруулаах уонна сокуону оҥорор былаастарга кэмигэр иһитиннэрэн, олохпут уйгулаах, уопсастыба быраап өттүнэн көмүскэллээх, судаарыстыбаҕа куттал суоһаабат буоларын хааччыйарын бэлиэтээтэ. Кини Борис Андреевка Ил Түмэн Бочуоттаах грамотатын, Ангелина Сувороваҕа Махтал суругу, Татьяна Крыловецкаяҕа, Владимир Лебедевкэ, Геннадий Остаровка, Иван Протопоповка бэйэтэ салайар сис кэмитиэтин наҕараадатын туттарда.
-
0
-
0
-
0
-
0
-
0
-
0
