Ол курдук, оскуола оҕуруотун, тэпилииссэтин көрөр лааҕыр бэһистэн Х кылааска диэри үөрэнээччилэри хабан үлэлэтэр. Быйыл «Кэнчээри» лааҕыры Винокурова Евдокия Прокопьевна уонна Радченко Анжелика Алексеевна салайдылар.
Манна оҕуруоту бүөбэйдээһинтэн ураты дойдубут эмтээх үүнээйитин хомуйан, хатаран, кыһыҥҥыга хаһааныы эмиэ бэрт тэрээһиннээхтик ыытылынна.
Оҕолор ханнык эмтээх от үүнэрин, ону хайдах, хаһан хомуйары биллилэр уонна эмтээх оту сатаан хатарарга, хаһаанарга үөрэннилэр.
Бастатан туран, кучу сэбирдэҕинэн чэй бэлэмнээтилэр.
Маннык чэйи былырыыҥҥыттан хомуйан хатарабыт. Кучу сэбирдэҕэр эбии моруоска отон сибэккитин хатаран, эбии булкуйан, ханна да суох чэйи оҥорбуппут.
Былырыын оҕолор кучу сэбирдэҕин биир ньыманан хатарбыт эбит буоллахтарына, быйыл икки ньыманан хатарарга үөрэннилэр.
Лааҕыр иитиллээччилэрэ кучу сибэккититтэн мүөт оҥорорго холоннулар. Онуоха анаан кучу сибэккитин үргээн, оргутан, иһиттэргэ кутан, уһун тымныы кыһыҥҥа оскуолабыт остолобуойугар хаһааннылар.
Онон кыһын доруобуйабытын бөҕөргөтөр, бэйэбит дойдубут дыргыл сыттаах, эмтээх, мүөттээх чэйин иһиэхпит.
Нарыйаана Винокурова
Орто Халыма, Өлөөкө Күөл орто оскуолата,
14-с №-дээх «Эдэр корреспондент» пост юнкора.
-
0
-
0
-
0
-
0
-
0
-
0
