Дьокуускайга бу баскыһыанньаҕа Хомсомуол болуоссатыгар уонна пааркаҕа дьон тоҕуоруһа муһунна. Ырыаны-үҥкүүнү ансаамбыллар, тыйаатыр артыыстара көҕүлүттэн туттулар, атыы-дьаарбаҥка тэрилиннэ, көр-ооонньуу тэнийдэ.
Аҕа күрэҕэр 7 хамаанда кытынна. Ойбон алларан, мас хайытан, остуолбаҕа ыттан, бэрэбинэни суоран, сыал ытан, сатабылы ирдиир түһүмэхтэри уолаттарын кытта туораатылар. Бастакы миэстэни Киин уокуруктан Вячеслав уонна Айуол Слепцовтар ыллылар уонна карабин саанан наҕараадаланнылар.
Аҕа күрэҕин кыттааччыларын Дьокуускай баһылыга Евгений Григорьев кэлэн эҕэрдэлээтэ. Кини бу эппиэтинэстээх дуоһунаһыгар талыллан баран, норуокка бастакы тахсыыта буолла.
"Зиму-матушку проводим мы в весёлом хороводе!" диэн күнү тула эргийии, "Зима Якутская, прощай — народ дружней Весну встречай!" театрализованнай дьүһүйүү, эстрада артыыстарын "Весна — прекрасная пора!" кэнсиэрэ буолла .
Култуура уонна сынньалаҥ пааркатын аттракционнарыгар, каруселларыгар дьон-сэргэ, оҕо аймах дуоһуйа хатааһылаата.
Өрөспүүбүлүкэ үгүс бөһүөлэгэр кыһыны атаарыыга ат сүүрдүүтүн күрэҕэ тэриллибитэ кэрэхсэбиллээх. Дьэ, аны аҕыйах хонугунан хаарбыт ууллан бүтүө, сирбит хараарыа. Аныгыс көрсүөххэ диэри, чысхааннаах кыһыммыт барахсан!
-
0
-
0
-
0
-
0
-
0
-
0
