Дьокуускайга, аэропорка
Бэс ыйын 14 күнэ. Сарсыарда 8 чаас. Москуба сөмөлүөтэ кэлэн түспүтүн туһунан биллэрбиттэригэр, көрсөөччүлэр үөрэн үөгүлэһэ түстүбүт. «Үлэ Дьоруойугар Уруй-Айхал!» диэн суруктаах былакааты тэниччи туппут сахалыы таҥастаах ыччаттар икки кэккэнэн сэлэлии турдулар. Суруналыыстар устар аппарааттарын бэлэмнии туттулар. Тула үөрбүт-көппүт сирэйдэр. Дьоруойу көрсөөччүлэр кэккэлэригэр тыа хаһаайыстыбатын миниистирэ Александр Атласов, кини солбуйааччыта Артем Александров, Сунтаар улууһун дэлэгээссийэтэ бааллар.
Өр-өтөр буолбат, түөһүгэр кыһыл көмүс сулуһун күлүмүрдэппитинэн, үөрэн-көтөн сандаарбытынан, Владимир Африканович Михайлов тахсан кэлэр! Эҕэрдэлээһин, куустуһуу, сахалыы сиэринэн уруй-айхал, тула өттүттэн хаартыскаҕа түһэрии!
– Владимир Африканович, Бэрэсидьиэн Путин эйигин: «Саха Сирин курдук тыйыс айылҕалаах хотугу сиргэ Африканович буолар күүстээх» диэбитэ, – «Саха» иһитиннэрэр-биллэрэр хампаанньа суруналыыһа микрофонун туһаайар.
– Ээ, инньэ диэн чахчы эппитэ, – диир Владимир Африканович. – Барыта долгутуулаах баҕайы этэ, киһи тылынан кыайан эппэт, мин нэһиилэ аһарыммытым... Саҥа кулуубу кытары сүөһү иитэр комплекс тутууларын туруорсубуппун, Владимир Путин ылыммыта. Дойдум дьонугар кытаанах доруобуйаны, уһун, дьоллоох олоҕу баҕарабын. Өссө таһаарыылаахтык үлэлиэҕиҥ, Кириэстээхпит үүнэ-сайда туруохтун. Бэйэм доруобуйам баарын тухары үлэлиэм, инним диэки өссө хардыылаан иһиэҕим.
Ил Дархаҥҥа
Бу күн Владимир Африкановичка киэҥ бырагыраамалаах буолла. Ол курдук, Ил Дархан Айсен Николаевка приемҥа сылдьан, олох-дьаһах, үлэ-хамнас туһунан сэһэргэстэ. Биллэн турар, онно Москубаҕа сырыытын, Бэрэсидьиэҥҥэ тугу туруорсубутун, Кыайыы Пааркатыгар, Поклоннай Гораҕа судаарыстыбаннай былааҕы өрө көтөҕүү сиэригэр-туомугар кыттыбытын, кэргэнин уонна кыыһын кытары куорат кэрэ-бэлиэ сирдэринэн дьаарбайбыттарын туһунан эмиэ кэпсээтэ.
Салгыы Үс Хатыҥҥа ытык сэргэни туруоруу сиэригэр-туомугар кытынна.
Министиэристибэ үбүлүөйдээх ыһыаҕар
Бүгүн Үс Хатыҥҥа Саха Өрөспүүбүлүкэтин 100, Тыа хаһаайыстыбатын министиэристибэтин 100 сылларыгар анаммыт үбүлүөйдээх ыһыахха өрөспүүбүлүкэ агропромышленнай комплексын үлэһиттэрэ бэйэбит биир идэлээхпитин, Үлэ Дьоруойа Владимир Африканович Михайловы чиэстээтибит!
Бырабыыталыстыба Бэрэссэдээтэлэ Андрей Тарасенко дохсун ытыс тыаһын ортотугар Владимир Африкановичка Ил Дархан бириэмийэтин (1 мөл. солк.) туттарда.
Үбүлүөйүнэн дьоһун бэлэх
Андрей Находкин, Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ:
– Владимир Африканович икки төгүл Үлэ Дьоруойа буолла: Сэбиэскэй Сойуус кэмигэр «Үлэ Албан аата» уордьан толору кавалера дьоруойга тэҥнэнэрэ. Кини тыа хаһаайыстыбатын үлэһиттэрин үөрүүлэрэ, киэн туттуулара, арааһа, Гагарин космоска көппүтүн кытта тэҥэ буолуо. Аныгы Арассыыйаҕа Дьоруой аатын ылбыт 78 киһи баарыттан дьиҥ тыа сиригэр үлэлиирэ, олороро алта эрэ, олортон үһэ – Саха Сириттэн! Чахчы да, киһи киэн туттуон туттар! Владимир Африканович 48 сыл устата үлэлээбит сыралаах үлэтин түмүгэ сыаналанна. Өрөспүүбүлүкэбит төрүттэммитэ, Тыа хаһаайыстыбатын министиэристибэтэ тэриллибитэ 100 сылларынан, Социалистическай Үлэ Дьоруойа Гаврил Самсонов төрөөбүтэ 100, бастакы сопхуостар тэриллибиттэрэ 55 үбүлүөйдээх сылларынан дьоһун бэлэх буолла! Аатырбыт ыанньыксыты чиэстээһин кэмигэр көрүстүм -- үлэ киһитэ үлэтигэр, пиэрмэтигэр, ынахтарыгар бараары ыксыыр.
- 10
- 0
- 0
- 0
- 0
- 0