Уопсастыба

Былырыыҥҥыттан бу икки дьаһал оннугар «Киһи сылдьар эйгэтэ куттала уонна буортута суох буолуутун хааччыйыыга гигиена нуормата уонна  ирдэбиллэрэ» диэн СанПиН 1.2.3685-21 №-дээх дьаһала, итиэннэ Роспотребнадзор сүбэтэ олоххо киллэриллибитэ.
— Ааспыт өттүгэр үлэни биэрээччи тустаах температураҕа үлэ чааһын кылгатар эбээһинэстээх эбит буоллаҕына, билигин ол сүбэ быһыытынан эрэ этиллэр, – диир Арассыыйа Тутулуга суох идэлээх сойуустарын федерациятын үлэ тиэхиньикэтигэр сүрүн иниспиэктэрэ Алексей Безюков. – Үлэни биэрээччи үлэһиттэр доруобуйаларыгар төһө охсуу оҥоһуллар кутталлааҕынан көрөн, быһаарыыны бэйэтэ ылынар. Үөскүүр кутталы хайдах намтатыахха сөбүн туһунан Роспотребнадзор Сүбэлэрэ сайтка бааллар. Ол эрээри, өскөтүн үлэни биэрээччи ону толорбот, эбээһинэһин кэһэр түбэлтэтигэр, үлэһит салайааччыта кини доруобуйатыгар хоромньуну оҥорорун туһунан тустаах уорганнарга биллэрэр бырааптаах. Тоҕо диэтэххэ, сайыҥҥы өҥүрүк куйааска, үлэ миэстэтигэр, офиска уонна хонтуораҕа + 35 кыраадыс итиигэ кондицонер суох түбэлтэтигэр, арҕана ыарыылаах, сүрэх ыарыһах дьоннор оҕустарыахтарын, инсуллуохтарын сөп. Оннук түбэлтэ аҕыйаҕа суох.

Үлэ кодексатын быһыытынан, үлэни биэрээччи үлэҕэ куттал суох буолуутун тэрийиэхтээх. Куйаас кэмҥэ кондиционер туруоруон уонна Роспотребнадзор Сүбэлэринэн, үлэһити дьиэтигэр 2-4 чаас эрдэ көҥүллүөн сөп. Офиска салгын температурата +28,5 кыраадыс сылаас буоллаҕына, үлэ күнэ 1 чаас; + 29 кыраадыс сылааска 2 чаас; + 30,5 кыраадыс сылааска 4 чаас кылгатыллар.