Бүгүҥҥү күҥҥэ икки таһымнаах олохтоох салайыныы ситимэ «Аһаҕас былаас биир кэлим тиһигэр олохтоох салайыныыны тэрийии сүрүн тосхоллорун туһунан» 33 №-дээх федеральнай сокуонунан итиэннэ «Саха Өрөспүүбүлүкэтигэр олохтоох салайыныы туһунан» диэн ааспыт сыл ахсынньы ыйыгар ылыллыбыт сокуонунан сүрүннэнэр. Өрөспүүбүлүкэ сокуонун биир уратытынан быйылгыттан муниципальнай тэриллиилэр баһылыктарын быыбара бэрэстэбиитэллээх уорганнарынан ыытыллара буолар. Итинник саҥа ирдэбилгэ сөп түбэһиннэрэн дьокутааттар улуустааҕы, нэһилиэктээҕи Сэбиэттэрэ муус устар ыйга диэри муниципальнай тэриллиилэр Устааптарыгар сокуоҥҥа сөп түбэһиннэрэн, саҥа уларытыылары киллэриэхтээхтэр.
Төгүрүк остуолу киирии тылынан арыйбыт улуус баһылыга Сергей Винокуров олохтоох салайыныы саҥа сокуонунан баһылыктар быыбардарын ыытар бэрэстэбиитэллээх уорганнар дьокутааттарыгар улахан эппиэтинэс сүктэриллибитин бэлиэтээтэ. Кэпсэтиини салайан ыыппыт оройуон Сэбиэтин бэрэссэдээтэлэ Гаврил Корякин төгүрүк остуол Устааптары ылыныы уонна баһылыктары талар куонкурус хамыыһыйаларын үлэлэрин бэрээдэгин тула ыытылларын чуолкайдаата.
Төгүрүк остуолга Дьокуускайтан видео-сибээһинэн быһаччы кыттыы тэриллибитэ сэҥээриини үөскэттэ. Ил Түмэн олохтоох салайыныыга сис кэмитиэтин бэрэссэдээтэлэ Владимир Прокопьев 2025 сыл ахсынньытыгар ылыллыбыт өрөспүүбүлүкэ сокуонун дьүүллэһиигэ Бүлүү улууһуттан элбэх этии киирбитин тоһоҕолоон бэлиэтээтэ. Юстиция министиэристибэтин Саха Сиринээҕи салаатын отделын начаалынньыга Намина Николаева Устаабы ылыныы бэрээдэгин бэрт сиһилии быһааран биэрдэ, баһылыктар, дьокутааттар элбэх ыйытыыларыгар хоруйдаата. Олохтоох салайыныы департаменын салайааччытын солбуйааччы Афанасий Старостин эмиэ элбэх ыйытыкка быһаарыы биэрдэ. Кини кулун тутар ыйга үлэлиир болдьохторо бүтүөхтээх Хаҕын, II Күүлэт баһылыктарын боломуочуйалара 67 №-дээх федеральнай сокуонунан балаҕан ыйыгар, Быыбар биир кэлим күнүгэр, диэри уһатыллан биэрбитин чопчулаата.
«Бүлүү улууһун муниципальнай тэриллиилэрин баһылыктарын дуоһунаһыгар хандьытааттары талар куонкурсу ыытар хамыыһыйа үлэтин бэрээдэгин туһунан» боппуруос элбэх дьүүллэһиини таһаарда. Гаврил Корякин хамыыһыйалар үлэлэрин хас биирдии түһүмэхтэрин билиһиннэрэр табылыыссалары туһанан бэрт өйдөнүмтүө иһитиннэрии оҥордо. Кини улуус үрдүнэн куонкурус хамыыһыйаларын чилиэннэрин ахсааннарын 6 киһилээх оҥорорго сүбэлэспиттэрин, хамыыһыйалар үлэлиир бэрээдэктэрин сиһилии билиһиннэрдэ, элбэх ыйытыкка хоруйдаата. Куонкурус хамыыһыйатын чилиэннэрин аҥара нэһилиэктэн, аҥара улуустан ананаллара, рейтинг туттуллара чуолкайданна.
Дьокутааттар баһылыгы куоластыыр быыбардара хас да турдаах буолуон сөбө, тэҥнэһиигэ бэрэссэдээтэл куолаһа быһаарыылаах буолара этилиннэ. Манна эмиэ сыанабыл рейтинэ туттуллуохтаах. Баһылыктар быыбардарын бэрээдэгин барылын хас биирдии түһүмэҕэ, бары түгэни болҕомтоҕо ылан туран, кичэллээхтик оҥоһуллубутун бэлиэтиэххэ сөп. Барылы оҥоруу олохтоох салайыныы урукку 131 №-дээх, билиҥҥи 33 №-дээх федеральнай сокуоннары, быыбардар тустарынан 67 №-дээх федеральнай сокуону, өрөспүүбүлүкэ муниципальнай быыбардарын туһунан сокуону билиигэ, туһаныыга дириҥ компетенциялары ирдиирин санатыахха сөп. Улуус салалтатын муниципальнай тэриллиилэр баһылыктарын быыбарыгар барыла киэҥ дьүүллэһии кэннэ биир санаанан ылылынна.
Төгүрүк остуолу видео-сибээһинэн көрөн олорбут Ил Түмэн сис кэмитиэтин салайааччы Владимир Прокопьев бэрт сэргэх төгүрүк остуол тэриллибитин, үчүгэй кэпсэтии, санаа атастаһыыта тахсыбытын бэлиэтээтэ, бүлүүлэр дьүүллэһэн ылынан эрэр уларытыыларын модельнай оҥорон, өрөспүүбүлүкэҕэ холобур оҥостуохха, тарҕатыахха диэтэ.
Түмүккэ, көхтөөх дьүүллэһиилээх төгүрүк остуол быһаарыыларын үлэҕэ ыларга сүбэлэннэ.
Хаартыска: Николай Куприянов.
-
0
-
0
-
0
-
0
-
0
-
0
