Ити күн РСФСР Үрдүкү Сэбиэтин Суһал ыҥырыылаах сиэссийэтэ бу былааҕы Арассыыйа национальнай былааҕынан билинэр туһунан уурааҕы ылыммыта. Онтон ыла үрүҥ, халлаан күөҕэ уонна кыһыл дьүһүннээх былаах гиэрбэни уонна гимны кытары Арассыыйа саҥа судаарыстыбатын официальнай судаарыстыбаннай символа буолбута.
Историяттан биллэринэн, үс өҥнөөх былаах аан бастаан 1667 сыллаахха, Алексей Михайлович ыраахтааҕы саҕана «Орел» диэн нуучча байыаннай хараабылыгар ыйаммыта. Петр I ыраахтааҕы 1705 сыллаахха, тохсунньу (20) 31 күнүгэр нуучча бары аалларыгар маннык былаахтары ыйыыр туһунан ыйааҕы таһаарбыта. Арассыыйа былааҕар тоҕо, чуолаан, бу үс өҥ талыллыбытын туһунан мөккүөргэ историктар да, учуонайдар да биир тылга кэлэ иликтэр. Ол эрээри, хас биирдии өҥ бэйэтэ туспа суолталаах дииллэр итиэннэ үгүстэр маҥан өҥ ыраас санааны, халлаан күөҕэ – чиэһинэй уонна эрэллээх буолууну, оттон кыһыл – хорсун, эрдээх санааны итиэннэ Аҕа дойду иһин тохтубут хааны көрдөрөрүн этэллэр. Үс өҥнөөх былаах официальнай ыстаатыһы 1896 сыллаахха, Николай II ыраахтааҕы солотугар киирэригэр, ылбыта. Өктөөп өрөбөлүүссүйэтин кэнниттэн, 1918 сыллаахха Яков Свердлов этии киллэриитинэн, бассабыык былааһа уот кыһыл дьүһүннээх былаахтаммыта. Оттон 1991 сыл атырдьах ыйын 22 күнүгэр Арассыыйа дьокутааттара саҥа Арассыыйа былааҕынан нуучча судаарыстыбатыгар үс үйэ устата аргыс буолбут үс өҥнөөх былааҕы билиммиттэрэ. Бэрэсидьиэн Борис Ельцин 1994 сыллаахха, атырдьах ыйын 20 күнүгэр таһаарбыт ыйааҕынан, атырдьах ыйын 22 күнэ Арассыыйа Федерациятын Судаарыстыбаннай былааҕын күнүнэн олохтоммута. Итинтэн ыла бу күн сыллата үрдүк таһымҥа бэлиэтэнэр, бүтүн дойду үрдүнэн, хас эрэгийиэн, куорат уонна нэһилиэнньэлээх пууннар ахсын Арассыыйа судаарыстыбаннай символларын суолталарын быһаарар дьаһаллар, патриотическай аахсыйалар, ыччат флешмобтара ыытыллаллар.
Саха Өрөспүүбүлүкэтэ бу дьоһун даататтан туора турбат. Судаарыстыбаннай былаах чиэһигэр анаммыт тэрээһиннэр киин куоракка атырдьах ыйын 20 күнүттэн саҕаланнылар. Сарсыарда 10:00 чаастан Хомсомуол болуоссатыттан Үс Хатыҥҥа диэри бэлисипиэдинэн сүүрүү, «Россия – моя история» мусуой комплексыгар тематическай быыстапкалар, М.Ф.Габышев аатынан Омук дойдуларын искусствотын галереятыгар уруйга дьарыктар ыытылыннылар.
Атырдьах ыйын 22 күнүгэр сарсыардаттан Хомсомуол, Ленин, Орджоникидзе, Доҕордоһуу уонна Кыайыы болуоссаттарыгар «Раздача лент-триколор» аахсыйалар, кэнсиэртэр ыытыллыахтара. Култуура уонна сынньалаҥ пааркатыгар, Сайыҥҥы сыанаҕа флешмоб уонна оҕолорго уруһуй куонкурустара тэриллиэхтэрэ. Наукалар дьоҕус академияларыгар уонна оҕо сайыҥҥы лааҕырдарыгар Судаарыстыбаннай былааҕы көтөҕүүлээх үөрүүлээх линейкалар, Култуура дьиэлэригэр үөрүүлээх тэрээһиннэр ыытыллыахтара.
Социальнай ситимнэргэ https://quizplease.ru/corppage?id=deh0J «Арассыыйа символлара» квиз-оонньуу, https://nlrs.ru. сыылканан Национальнай библиотека виртуальнай быыстапката буолуоҕа.
Киэһэ 17:00 чаастан А.Е. Кулаковскай аатынан Норуоттар доҕордоһууларын дьиэлэригэр, АртАтриумҥа бырааһынньыктааҕы кэнсиэрт итиэннэ «Доҕордоһуу плова» аһымал санаа аахсыйата буолар. Куорат олохтоохторун уонна ыалдьыттарын бырааһынньыгынан «Раздолье» народнай ансаамбыл, «Молодая Якутия» патриоттар кулууптара, «Контраст» айар холбоһук, «Колымчанка» юкагир фольклорнай ансаамбыла уо.д.а. эҕэрдэлиэхтэрэ. Киэһэ телебашка уоттара Арассыыйа Судаарыстыбаннай былааҕынан өҥүнэн тырымныы умайыахтара.
-
1
-
0
-
0
-
0
-
0
-
0
