Бөртөлүөт балтараа ый устатыгар барыта тоҕус рейси оҥорбутуттан биэс рейс тэрилтэлэртэн, холбоһуктартан, биирдиилээн дьонтон хомуллубут гуманитарнай көмөнү тиэрдиигэ ананна. Ону таһынан от ыйын бүтүүтүгэр Мииринэй оройуонун Арыылаах нэһилиэгин таһыгар турбут ойуур баһаарын умуруорууга көмөлөспүтэ.
Бырабыыталыстыба Бэрэссэдээтэлин бастакы солбуйааччы Дмитрий Садовников ону бэлиэтээн туран, бөртөлүөт экипаһыгар махталын биллэрдэ, хамандыыр Александр Ляляевка, иккис пилот Ренат Неврединовка, штурман Евгений Чикуновка уонна экипаж атын чилиэннэригэр судаарыстыбаннай наҕараадалары туттарда.
– Тутуу матырыйааллара кэмигэр тиэрдиллэн, чөлүгэр түһэрэр үлэ уталыппакка ыытылынна. Бу эһиги үтүө суобастаах үлэҕит уонна Арассыыйа Федерациятын Ыксаллаах быһыыга-майгыга министиэристибэтин кыһамньытын түмүгэ буолар, – диэтэ Дмитрий Садовников.
Ыксаллаах быһыы-майгы министиэристибэтин «Ми-26» бөртөлүөтэ Айсен Николаев сайаапкатынан, Саха сиригэр от ыйын 19 күнүгэр кэлэн үлэлээтэ.
Ил Дархан уонна Бырабыыталыстыба пресс-киинин матырыйаалынан.
- 0
- 0
- 0
- 0
- 0
- 0