Бастатан туран, тыа сирин сайыннарыыга туһуламмыт бырайыактарга сайаапкалары дойду эрэгийиэннэриттэн хомуйуохтара. Федеральнай бүддьүөттэн үп-харчы социальнай тэрилтэлэр саҥа эбийиэктэрин тутууга (балыыһа, оскуола, оҕо уһуйаана, култуура уонна успуорт киинэ), өрөмүөннээһиҥҥэ, суоллары саҥардыыга уонна нэһилиэк иһинээҕи уот, уу, гаас ситимин тардыы хайысхаларыгар көрүллэр. Куонкурустаах бырайыакка кыттар докумуоннары СӨ Тыатын хаһаайыстыбатын министиэристибэтигэр тиксэриллиэхтээх.
Быйыл дойду 52 эрэгийиэнин 140-тан тахса тыа сирин сайыннарыыга анаммыт бырайыага хабылынна. Тэрээһиҥҥэ мөлүйүөн кэриҥэ киһи хабыллара күүтүллэр. Бу туһунан дойду Тыатын хаһаайыстыбатын министиэристибэтэ иһитиннэрэр.
Иккиһинэн, пиэрмэрдэр, кээпэрэтииптэр уонна кэтэх хаһаайыстыбанан дьарыктанар биирдиилээн дьон, чуолаан тыа хаһаайыстыбатын салаатыгар сылга 200 мөл.солк. диэри дохуоттаах оҥорон таһаарааччылар, чэпчэтиилээх кирэдьиити туһаныахтарын сөп.
Ол курдук, биэдэмистибэ бигэргэппит бирикээһинэн, сыл бастакы кыбартаалыгар кылгас болдьоххо биир хаһаайыстыба ылыан сөптөөх муҥутуур кирэдьиит кээмэйэ маннык хайысхаларга арахсар: үүнээйи үүннэриитигэр - 20 мөл.солк., кыыл иитиитигэр - 150 мөл.солк., үүнээйи үүннэрии уонна кыыл иитии бородууксуйатын оҥорон таһаарыы - 350 мөл.солк., ынах сүөһү иитиитигэр уонна үүтү туттарыыга - 200 мөл.солк.
Санаттахха, 2017 с. тохсунньу 1 күнүттэн тыа хаһаайыстыбатын бородууксуйатын оҥорон таһаарааччылар эбэтэр кэтэх хаһаайыстыбалар дойду Тыатын хаһаайыстыбатын министиэристибэтэ бигэргэппит бирикээһинэн, кылгас болдьохтоох 5 % чэпчэтиилээх кирэдьиити туһаныахтарын сөп.
-
0
-
0
-
0
-
0
-
0
-
0
