Уопсастыба

Айар бөлөх Хаңалас, Дьиикимдэ уонна Ньурбачаан нэhилиэктэригэр испэктээги кѳрдѳрдѳ. Испэктээк уотун-күөһүн эдэр уолаттар А. Михайлов, В. Николаев кыайа туппуттар, артыыстары эрэллээх суоппардара Александр Николаев таста.

Тохсунньу 23 күнүгэр Хаҥалас нэһилиэгин олохтоохторо тыйаатыр кэрэ эйгэтигэр кыттыһан, испэктээги астына көрдүлэр, сэҥээрдилэр, күлэн үйэлэрин уһаттылар. Ол туһунан олохтоох бибилэтиэкэр Мария Николаева маннык суруйар: «Испэктээккэ Ньурба тыйаатырын киэн туттуулара буолбут СӨ үтүөлээх артыыстара Майя Слепцованы, Венера Никитинаны кытта бары да талааннаах эдэр артыыстар иэйэн-куойан туран оонньообуттара Ньурбабыт тыйаатыра кэскиллээҕин туоhулуур. Ол курдук, омуннаах Уйбаан сүрүн оруолун — Роман Семенов, Хаахынай Сэмэн оруолун — Петр Филиппов, Кыра уол оруолун— Олег Конощук, итиэннэ Сардана Михайлова, Ася Колесова толорууларын көрөөччү чугастык ылынна. Ону тэңэ испэктээккэ кэмиэдьийэ жанрын кыайа тутан оонньообут, уруккуттан да сөбүлээн көрөр артыыстарбыт — СӨ култууратын туйгуннара Прокопий Федоров, Олег Конощук, Надежда Афанасьева, Артур Евсеев Ньурба тыйаатыры таптааччыларын сүгүрүйүүтүн элбэхтик ылан кэллэхтэрэ».

Хас нэhилиэк аайы көрөөччүлэр испэктээк түмүк чааһын «браво», «бис» хаһыынан доҕуһуоллаан артыыстарга кэрэ түгэннэри бэлэхтээтилэр. «Тиэтэйбити» көрбүт нэһилиэктэр олохтоохторо, испэктээги биһирээбиттэрин куйаар ситимигэр ыытан үөрүүлэрин үллэстибиттэр.

Ол курдук, нэһилиэк олохтооҕо Валентина Николаева: «Бу иннинэ «Тиэтэйбити» Саха тыйаатырын туруоруутугар уонна киинэтин көрүөхпүн баҕарар этим. Оттон бэҕэһээ көрөммүн наһаа астынным, бэйэбит да артыыстарбыт оһуобай үчүгэйдик оонньууллар эбит».

Оттон Хаҥалас МТ дьаһалтатын баһылык солбуйааччыта Семен Семенов дьиэ кэргэнинэн кэлэн көрѳн баран: «Ньурбатааҕы судаарыстыбаннай көһө сылдьар драматическай тыйаатыра Н. Неустроев «Тиэтэйбит» кэмиэдьийэтин туруорбутун көрөн, олус сэҥээрэн кэллибит. Артыыстар бэркэ да оонньууллар, оруолларыгар киирэллэрэ киһини сөхтөрөр», — диэн суруйбута элбэҕи этэр.

"Тыйаатыр — ураты эйгэ, манна көрөөччү музыка дьүрүскэн тыаһыгар уйдаран, сыанаҕа буолар кѳстүүттэн үөрэн күлүөн, хомойон ытыан да сөп. Толкуйга түhүѳххэ уонна дьиктиттэн соһуйуохха эмиэ сөп. Билигин, сайдыы тэтимэ түргэнник уларыйа турар кэмигэр, эдэр көрөөччүлэр искусство бу саамай уһулуччулаах эйгэтин — тыйаатыры таптыы, умсугуйа көрөллөрүгэр баҕа санаабын тиэрдэн туран, Саха тыйаатырын төлкөтүн түстэспит улуу Алампа тылларынан түмүктүүбүн: «Тыйаатыр — киһи үчүгэй санаатын уһугуннарар, сайыннарар оскуола» - диэн суруйбуттара эмиэ олус астыннарар..

Ньурба тыйаатырын кэлэктиибин аатыттан нэһилиэктэрбит олохтоохторугар, күндү көрөөччүлэрбитигэр истиҥник көрсѳллѳрүн, сайаҕас санааларын иһин махтанабыт.

Арассыыйаҕа Учуутал уонна уhуйааччы сылыгар, Саха Ѳрѳспүүбүлүкэтигэр Үлэ сылыгар анаммыт гостуруолга айар бөлөх тохсунньу 30 күнүттэн олунньу 8 күнүгэр диэри Үөһээ Бүлүү улууһун нэһилиэктэринэн сылдьыаҕа. Кырачаан көрөөччүлэргэ саха норуотун остуоруйаларын матыыптарынан Алгыс Макаров туруорбут «Кутурук күрэҕэ» остуоруйаны, оттон улахан дьоҥҥо Николай Неустроев кэмиэдьийэтинэн «Тиэтэйбит» испэктээги көрдөрүөхтэрэ.

Ньурба тыйаатырын саҥа дьиэтигэр өрөспүүбүлүкэбит тыйаатырдарын гастролларын Саха тыйаатыра саҕалаабыта.

Тохсунньу 26 күнүттэн Ньурба тыйаатырын саңа дьиэтигэр Суорун Омоллоон аатынан Опера уонна балет тыйаатыра ыалдьыттыыр. Кинилэр сюита-балеты уонна гала кэнсиэри кѳрѳѳччүлэргэ бэлэхтииллэр.

Олунньу 3 күнүгэр - Олоҥхо, тыйаатыра,  олунньу 10 күнүгэр - Үүнэр көлүөнэ тыйаатыра кэлэллэрэ күүтүллэр.