Саха Сирэ Уһук хоту киирэрин быһыытынан, тымныы тыйыс усулуобуйаҕа үлэлиир дьоҥҥо итинэхэ 80% эбиллэр уонна 1,7 – 2,0 оройуоннааҕы эбилик ааҕыллар. Онон өрөспүүбүлүкэҕэ быйыл хамнас алын кээмэйэ Дьокуускайга 40 605 солк., хоту улуустарга 45 478 солк. тиийдэ. Оттон Саха Сиригэр 2022с. сэтинньитигэр ааҕыллыбыт орто хамнас 96 372, 5 солк.
Алын хамнаһы ылар дьон билигин сыана саамай муҥутаан ыараан турар кэмигэр дьадайыыга чугаһаан олороллор. 40 000 солк. иһинэн-таһынан хамнаска дьиэ кэргэҥҥин кыайан ииппэккин, ипотекаҕын төлөөбөккүн. Кыра хамнастаах киһи төһө даҕаны ийэ хапытаалынан мэҥиэлээбиттэрин иһин, элбэх оҕолонор кыаҕа суох. Онон демографическай балаһыанньаны тупсарарга, саханы элбэтэргэ, бастатан туран, кыра хамнастаах дьон дохуотун үрдэтиэххэ наада.
Сокуон быһыытынан, тэрилтэ салайааччыта ити ыйыллыбыт алын хамнастан кыра хамнаска дьону үлэлэтиэ суохтаах. Хамнас алын кээмэйиттэн кыраны төлүүр тэрилтэ административнай эппиэтинэскэ тардыллыан сөп.
- 0
- 0
- 0
- 0
- 1
- 0