Кэтэх ыаллар оттоон бүтэннэр, билигин ходуһаларга сүрүннээн хаһаас оту хааччынааччылар уонна элбэх сүөһүлээх бөдөҥ хаһаайыстыбалар отчуттара, 6 267 араас мааркалаах тыраахтардаах, 5 513 звено, ол иһигэр 1 603 толору мэхэньисээссийэлээх, 2 077 ситэтэ суох мэхэньисээссийэлээх, 45 көлөнөн оттуур, 1 852 илиинэн оттуур звенолар, барыта 14 тыһыынча кэриҥэ киһи үлэлии-хамсыы сылдьаллар.
Биирдиилээн ылан көрдөххө, Нам улууһа 28 442 туоннаны оттоон, былаанын 103,19 % толордо! Бу курдук сорудахтарын Ньурба улууһа 99,5 % (30 109 т.), Өлүөхүмэ 97,8 (14 972 т.), Дьокуускай к. 96,7 % (10 491), Горнай 94,8 % (11 528), Хаҥалас 94,5 % (29 306 т.), Уус Алдан 94,7 % (31 727 т.), Мэҥэ Хаҥалас 93,3 % (41 078), Кэбээйи 91,6 % (9 730), Сунтаар 91,4 % (31 075 т.) толорон иһэллэр.
Сайын саҕаланыытыгар, былырыыҥҥы халаан уутун уонна кыһыҥҥы халыҥ хаар содулларыгар кэккэ улуустар былааннарын ырааҕынан толорбот туруктаахтара. Холобур, 12 155 туоннаны оттуур былааннаах Горнай улууһа окко киириигэ үгүс ходуһалара ууга сыталлара. Ол эрээри, күн бүгүҥҥү туругунан, улуус хаһаайыстыбалара 11 528 туоннаны оттооннор, сүөһүлэрин-сылгыларын кыстатар отторун 94,8 %-ын хааччынары ситистилэр! Даҕатан эттэххэ, бу улууска мобильнай биригээдэлэринэн ыраах учаастактарга уонна үрэх бастарынан баран оттооһун бэрт эрдэттэн тэриллибитэ.
Ити курдук, күн-дьыл этэҥҥэ туран биэрэн, кутталлаах соҕус балаһыанньалаах улуустар куһаҕана суох оттоотулар. Манна тиэхиньикэҕэ эрэ найыламмакка, илии хотуурунан сирийэн оттуур сорук күүскэ туруоруллубута эмиэ улахан оруолу ылла. Үгүс улуустар дьаһалталара бүддьүөттэриттэн үп көрөннөр, мотуордаах хотуурдары атыылаһыы ороскуоттарын толуйдулар.
Арай, кыстыыр отторун Эбээн Бытантай улууһа 37 %-ын, Мииринэй улууһа 23 %-ын эрэ булунан, кыраапыктан олус хаалан иһэр эбиттэр. Тыа хаһаайыстыбатын улуустардааҕы управлениеларыттан түмүллүбүт саҥа чахчы быһыытынан, өрөспүүбүлүкэ үрдүнэн 417 304 туонна от оттонуон сөп диэн сабаҕаланар.
-
0
-
0
-
0
-
0
-
0
-
0
