Уопсастыба

– Биһиги өрөспүүбүлүкэбитигэр бүгүн долгутуулаах күн: хорсун-хоодуот буойуннары, Арассыыйа дьоруойдарын, номнуо номоххо киирбит «Алеша» тааҥка оператор-наводчига Алексей Неустроевы уонна водитель-механик Филипп Евсеевы чиэстиир өрөгөйдөөх күммүт үүннэ, -- диэтэ Айсен Николаев. -- Арассыыйа Федерациятын Үрдүкү кылаабынай командующайа Владимир Путин кинилэргэ Дьоруой сулуһун Курскай Тоҕойго кыайыы 80 сылын бэлиэтиир дьаһалга, тааҥканан кыргыһыы буолан ааспыт ытык сиригэр туттарбыта. Ити мээнэҕэ буолбатах, Аҕа дойдуну көмүскүүр Улуу сэрии сылларыгар Филипп Евсеев эһэтэ Николай Ващенко Курскай тоҕойго сэриилэспитэ. Алексей Неустроев биһигин ыйаабыт сирэ, Уус Алдан Тандата – Сэбиэскэй Сойуус Дьоруойдара Михаил Стрекаловскай уонна Владимир Лонгинов төрөөбүт-үөскээбит дойдулара. Ити курдук, Ийэ дойдуга бэриниилээх буолар уонна кинини көмүскүүргэ дьулуһуу улуу үгэстэрэ көлүөнэттэн көлүөнэҕэ салҕанан иһэллэр.

-- Ытыктабыллаах Алексей Михайлович, ытыктабыллаах Филипп Александрович! Эһиги хорсун быһыыгытын Ийэ дойду үрдүктүк сыаналаата. Кириэмилгэ тэриллибит дьоруойдары кытары көрсүһүүгэ дойду Бэрэсидьиэнэ эһиги экипажкыт хас да төгүл баһыйар ахсааннаах өстөөҕү утары киирсиигэ ураты хорсун быһыытыгар, чочуллубут маастарыстыбатыгар болҕомтотун уурда. Ити көрсүһүү кэмигэр Владимир Владимирович миэхэ бэйэтин кабинетыттан төлөпүөнүнэн эрийэн, эһигини кытары быһа кэпсэтэр, сахалыы бастакынан эҕэрдэлиир кыаҕы биэрбитэ. Иллэрээ күн Бэрэсидьиэн өссө төгүл эрийэн, анал байыаннай дьайыы туһунан кэпсэппитэ, дьоруой уолаттарбыт хорсун быһыыларын иһин бүтүн өрөспүүбүлүкэҕэ махтаммыта. Саха сирин олохтоохторо патриотическай иэйиилэрэ күүстээҕин, Ийэ дойдуга, улуу Арассыыйаҕа бэриниилээхтэрин чорботон бэлиэтээбитэ. Саха норуотун патриоттуу санаатыгар хаһан да саарбахтаабатаҕын туһунан эппитэ, билигин ол патриотизмы бүтүн Арассыыйа, аан дойду биллилэр диэбитэ. Саха сирэ дьоруойдарынан киэн туттар, эһиги хорсун быһыыгытынан Саха Өрөспүүбүлүкэтин уонна бүтүн Арассыыйа историятыгар бэйэҕит ааккытын кыһыл көмүс буукубаларынан суруйдугут. Анал байыаннай дьайыы саҕаланыаҕыттан биһиги биир дойдулаахтарбыт ытык иэстэрин дьоһуннук толоро, хорсуннук сэриилэһэ сылдьаллар. Оттон биһиги манна, тыылга, бэйэбит таһаарыылаах үлэбитинэн дойдубутугар, бу ыарахан кэмҥэ тирэх буолабыт. Бары бииргэ сомоҕолоһоммут кыайыыны уһанабыт. Биһиги кыайыахпыт. Уруй-айхал хорсун саллааттарга, уруй-айхал саха боотурдарыгар! – диэтэ Ил Дархан итиэннэ Филипп Евсеевкэ, Алексей Неустроевка 1,5 мөл. солк. суумалаах харчынан сэртипикээттэри туттартаата.

Арассыыйа Дьоруойдарын харда тыллара кылгас эрээри, дьэҥкэ буолла.

– Биһиги, Саха сириттэн ыҥырыллан анал байыаннай дьайыыга тиийбит буойуннар, төрөөбүт-үөскэбит өрөспүүбүлүкэбит биһигини аҥардас бэйэбитин эрэ сэрии толоонугар хаалларыа суоҕа диэн мэлдьи билэр этибит. Бэйэбит чугас дьоммут уонна барыбыт уопсай кыайыыбыт туһугар биһиги инники кимэн иһэбит, бойобуой сорудахтары толоробут. Онно, фашизмы утары сэриилэһэ сылдьар дьон бука бары дьоруойдар, кинилэр эһиги уолаттаргыт, убайдаргыт, бырааттаргыт, аҕаларгыт. Биһиги үлэбитин Бэрэсидьиэммит уонна дойдубут үрдүктүк сыаналаатылар, бу – Саха Өрөспүүбүлүкэтин сыаналааһын буолар. Биһиги Саха сиригэр төрөөбүппүтүнэн киэн туттабыт. Түгэнинэн туһанан, өйөбүлгүт иһин махтанабын өрөспүүбүлүкэ салалтатыгар, Ил Дархан Айсен Сергеевичкэ, сүгүрүйэбин бары хаан-уруу дьоммор, – диэтэ Арассыыйа Дьоруойа Филипп Евсеев.

– Дойдубутун көмүскүү сылдьар саха уолаттара кыайыыга эрэллээхпит. Сахам сирин салалтатыгар уонна бары олохтоохторугар көмөҕүт, өйөбүлгүт иһин махтанабын. Биһиги кыайыахпыт! – диэтэ Арассыыйа Дьоруойа Алексей Неустроев.

Арассыыйа Дьоруойдарын эҕэрдэлээн «БАРС-2» этэрээт хамандыыра, Арассыыйа Дьоруойа Александр Колесов, өрөспүүбүлүкэ байыаннай хамыһаара Александр Авдонин тыл эттилэр.

Хаартыскаҕа Андрей Сорокин (ЯСИА) түһэриилэрэ.