Уопсастыба

– Балаҕан ыйын 2-3 күннэригэр Остуолба нэһилиэгин Улахан Сыһыы ходуһатыгар үһүс «Күүлэйбитин» тэрийэн ыыттыбыт. Онно алта хамаанда сайаапка биэрбититтэн, түөрдэ кэлэн кытынна: Остуолбаттан, Алыһардаах диэн Адыаччы нэһилиэгин учаастагыттан икки хамаанда итиэннэ Дьааҥы куораттан. Икки күннээх күүстээх үлэ түмүгүнэн, Алексей Слепцов салайар Остуолба хамаандата 4,34 гектардаах ходуһа отун охсон, харбаан бастаата. 100 тыһ солк харчынан бириэмийэлэннэ.

Иккис миэстэни Зоя Потапова салайар Алыһардаах 1 №-дээх хамаандата ылла. 3,32 гектардаах ходуһа отун охсон, харбаан, 80 тыһ солк харчынан бириэмийэлэннэ. Үһүс миэстэни Владимир Слепцов салайар Алыһардаах 2 №-дээх хамаандата ылла. 3,26 гектардаах ходуһа отун охсон, харбаан, 50 тыһ солк харчынан наҕараадаланна. Төрдүс миэстэни Герман Графов салайар Дьааҥы куорат хамаандата ылла, 2,91 гектардаах ходуһа отун охсон, харбаан, 20 тыһ солк харчынан бириэмийэлэннэ.

«Саамай бастыҥ охсооччу» аатын Алексей Слепцов, «Саамай бастыҥ харбааччы» аатын Владимир Харитонов (иккиэн Остуолбаттан) ыланнар, уоннуу тыһыынча солкуобайынан бэлиэтэннилэр. Биирдиилээн киирсиигэ Иван Стручков уонна оскуола үөрэнээччитэ Владимир Слепцов холоһоннор, гектартан ордук сири оҕустулар. «Күүлэй» кыттыылаахтарын икки күн устата Дария Стручкова, Анна Ефимова уонна Лена Богомолова минньигэс, тотоойу аһынан аһатаннар, отчуттар махталларын ыллылар.

Алыһардаах хамаандаларын салайан аҕалбыт, «Якутскгосопторг» ААУо салаатын дириэктэригэр махтанабыт. Барҕа махтал тылларын аныыбыт көх-нэм буолбут ытыктабыллаах бэтэрээммитигэр Христина Старостинаҕа, 88 саастаах ытык киһи кэлэн, сирбитин-уоппутун алҕаан, айах тутан, санаабытынн көтөххө. Киниэхэ кэпэрэтиип биир оҕус ньирэйи бэлэхтээтэ. 

Бу икки күн устатыгар  15 гектар иэннээх ходуһа сирэ охсуллан харбанна, ото олус хойуу диэн отчуттар бары олус астыннылар. Онон бары кыттыбыт, көмөлөспүт дьоммутугар махтанабыт, эһиилги «күүлэйдэргэ» эмиэ күүтэбит. Чэгиэн-чэбдик доруобуйаны, үлэҕитигэр ситиһиилэри баҕарабыт, сүөһүгүт-сылгыгыт элбии-хаҥыы туруохтуннар.