Уопсастыба

Ил Түмэн Бэрэссэдээтэлигэр «Биир ньыгыл Арассыыйа» баартыйа фракцията норуот дьокутаата Алексей Еремееви, «Саҥа дьоннор» баартыйа фракцията норуот дьокутаата Александр Ивановы туруордулар.

Тыл бэриллибитигэр хандьыдааттар үлэҕэ соруктарын иһитиннэрдилэр. Бэһис ыҥырыкка дьокутаатынан талыллан сис кэмитиэти салайбыт, ааспыт ыҥырыкка Бэрэссэдээтэллээбит уопуттаах парламентарий быһыытынан Алексей Еремеев этиитэ чопчу уонна дьэҥкэ буолла.

Оттон дьокутаат Александр Иванов Ил Түмэн Ил Дархан уонна Бырабыыталыстыба дьаһалтатын биир департаменын курдук буолла диэн туран, Алексей Еремееви скипертэн аккаастан, бу дуоһунаска үлэлиир кыахтаах дьон бааллар, оттон мин туспар куоластаатаххытына, норуоппут туһугар үлэлиэхпит, норуокка чугас парламент буолуохпут диэн, ааспыт өттүгэр ыытыллыбыт үлэни барытын сотон кэбиһэрдии эттэ. Ону биллэн турар, норуот дьокутааттара да, ыҥырыылаахтар да биһирээбэтилэр. Өрөспүүбүлүкэ Баһылыга Айсен Николаев Алексей Еремеев үлэтин-хамнаһын үрдүктүк сыаналыырын эттэ, кинини өйүүрүн биллэрдэ, норуот дьокутааттара Сахамин Афанасьев, Игорь Григорьев норуот дьокутааттарын Алексей Еремеевкэ куоластыырга ыҥырдылар. Кистэлэҥ куоластааһын түмүгүнэн, 61 куолаһы ылан, Алексей Еремеев Ил Түмэн Бэрэссэдээтэлинэн иккистээн талылынна.

Бэрэссэдээтэли бастакы солбуйааччы дуоһунаһыгар Александр Жирков кандидатурата туруоруллан, кистэлэҥ куоластааһынан бигэргэннэ.

Ааспыт ыҥырыктарга спикер икки солбуйааччылаах буоллаҕына, бу ыҥырыкка үс солбуйааччы көрүллэр буолбут. Норуот дьокутааттара ол тоҕотун туһунан ыйыппыттарыгар, Бэрэссэдээтэл маннык быһаарда:

– Үс солбуйааччы идэтийбит бастайааннай төрүккэ үлэлиэхтэрэ итиэннэ сис кэмитиэттэри салайыахтара, биир солбуйааччы судаарыстыбаннай тутул, иккис солбуйааччы бүддьүөт сис кэмитиэтин, үһүс солбуйааччы федеральнай бэбиэскэ быһыытынан, саҥа тэриллэр СВО бэтэрээннэрин, байыаннай сулууспалаахтары кытары үлэҕэ, патриотическай иитиигэ сис кэмитиэти салайыаҕа, – диэтэ.

Вице-спикер дуоһунаһыгар «Биир ньыгыл Арассыыйа» баартыйа фракцията Юрий Николаев, Афанасий Владимиров, Александр Подголов, КПРФ баартыйа фракцията Виктор Губарев, «Саҥа дьоннор» баартыйа фракцията Василий Николаев кандидатураларын туруордулар. Кандидаттар уонна кинилэри өйүүр норуот дьокутааттара кылгастык тыл эттилэр.

-- Отут сыл энергетика эйгэтигэр, боростуой инженертэн саҕалаан Бүлүүтээҕи ГЭС каскадын дириэктэригэр тиийэ үлэлээбитим, норуот дьокутаатынан бэһис төгүлүн талылынным, бэһис уонна алтыс ыҥырыктарга бүддьүөт кэмитиэтин салайбытым, вице-спикеринэн үлэлииргэ сөптөөх уопут баар, – диэтэ Юрий Николаев.

Кистэлэҥ куоластааһын түмүгүнэн, баһыйар куолаһы ылан Афанасий Владимиров, Юрий Николаев уонна Александр Подголов Ил Түмэн Бэрэссэдээтэлин солбуйааччыларынан талылыннылар.

Хаартыскаларга Василий Кононов (Ил Түмэн) түһэриилэрэ