Сокуон быһыытынан, норуот дьокутаата үстэн итэҕэһэ суох сис кэмитиэккэ үлэлиэн сөп. Сис кэмитиэттэр састааптарын барыллааһын испииһэгин билсэн баран, дьокутаат Владимир Федоров сайабылыанньатын үс сис кэмитиэккэ биэрбитин санатан туран, биир эрэ сис кэмитиэккэ киллэриллибитин эттэ. Түөрт сис кэмитиэккэ суруллубут дьокутаат Алексей Корнилов тутууга, олох-дьаһах хомунаалынай хаһаайыстыбатыгар уонна энергетикаҕа сис кэмитиэттэн тахсарын эттэ, дьокутаат Владимир Егоров бүддьүөт сис кэмитиэтигэр үөрэхтээһин эйгэтиттэн биир эрэ дьокутаат киллэриллибитин сыыһанан аахта. Бу кэмитиэккэ киирэргэ хас да дьокутаат баҕатын биллэрдэ.
– Бүддьүөт, үп-харчы, түһээн уонна сыана бэлиитикэтигэр, бас билии уонна приватизация боппуруостарыгар сис кэмитиэккэ үлэлииргэ 35 дьокутааттан сайабылыанньа киирбитэ, ол иһин биһиги барыллааһын испииһэккэ үлэлиир эйгэлэрин, уопуттарын көрөн уонна баартыйаларынан, быыбардаммыт уокуруктарынан сүүмэрдээммит, 17 дьокутааты киллэрбиппит, -- диэтэ тустаах сис кэмитиэт бэрэссэдээтэлэ Юрий Николаев.
Кинини ситэрэн, спикер үлэ хаамыытынан көрөн, сис кэмитиэт састааба хаһан баҕарар уларытыллыан, кэмитиэттэр истэринэн ротация оҥоһуллуон сөбүн, оттон бүддьүөтү көрүү боппуруоһа сис кэмитиэттэргэ барыларыгар ыытылларын, онно ылыллыбыт быһаарыылары, этиилэри бүддьүөт сис кэмитиэтэ барыларын түмэрин уонна олорго тирэҕирэн үлэлиирин туһунан сиһилии быһааран биэрдэ.
Төрүт олохтоох, аҕыйах ахсааннаах хотугу омуктар боппуруостарыгар уонна Аартыка дьыалаларыгар сис кэмитиэт бэрэссэдээтэлэ Елена Голомарева сис кэмитиэт ааспыт ыҥырыыга ыыппыт үлэтин, ол иһигэр Хотугу собуос уонна аҕыйах ахсааннаах хотугу омуктар төрүт дьарыктарын өйүүр туһунан федеральнай сокуоннар оҥоһуллалларын ситиспитин холобурдаан туран, норуот дьокутаата сис кэмитиэккэ элбэх боппуруоһу быһаарсар кыахтааҕын бэлиэтээтэ.
– Ол гынан баран, Аартыкаттан уонна хотугу улуустартан талыллыбыт алта дьокутаат биһиги кэмитиэппитигэр киирэргэ сайабылыанньа биэрбэтигит. Итини мин төрүт сатаан өйдөөбөппүн. Дьиҥинэн, сүрэххит этиитинэн, быыбардааччыларгыт накаастарын толорон, биһиги сис кэмитиэппитигэр үлэлиэх тустаах этигит буолбатах дуо? Харыстааммын эһиги араспаанньаларгытын манна аһаҕастык эппэппин, ол эрээри, Алексей Ильич, маны болҕомтоҕо ыларгытыгар көрдөһөбүн, – диэтэ бэркэ кыһыйан-абаран.
Онуоха тылтан дьиҥ дьыалаҕа ылсан, Алексей Еремеев Аартыкаттан уонна хотугу улуустартан талыллыбыт норуот дьокутааттара төрүт олохтоох, аҕыйах ахсааннаах хотугу омуктар боппуруостарыгар уонна Аартыка дьыалаларыгар сис кэмитиэккэ киирэллэригэр сүбэлээтэ.
– Норуот дьокутаата ханнык баҕарар кэмитиэккэ интэриэһиргээбит боппуруоһун дьүүллэһиигэ кыттыахтаах, оччотугар тустаах кэмитиэт ылбыт быһаарыыларын атын кэмитиэт чилиэнэ пленарнай мунньахха саҥа истэн, өйдөспөт буолууну таһаарыа суоҕа. Ити иһин, сүрүн кэмитиэттэр үлэлэрин аһаҕас оҥоруохха, парламент аппараата улахан суолталаах боппуруостары көрөр мунньахтары дьокутааттарга эрдэттэн этэн, биллэрэн, онлайн киэбинэн даҕаны кытыннарар уопуту киллэриэххэ, – диэтэ Владимир Федоров.
Хаартыскаҕа Василий Кононов (Ил Түмэн) түһэриитэ
-
5
-
0
-
1
-
0
-
0
-
0
