Павел Крашенинников санаппытынан, быыбар сокуонугар олоҕуран, РФ Бэрэсидьиэнин быыбара 2024 сыл кулун тутарга ыытыллыахтаах, 2023 сыл ахсынньытыгар Федерация Сэбиэтэ быыбар күнүн чуолкайдыыр быһаарыныыны ылыахтаах.
Кэмитиэт баһылыга быһаарарынан, барылга быыбар сокуонун олоччу уларытыыны киллэрэр туһунан этиллибэт. Ааптардар инники киирбит уларыйыылары бэрээдэктээһини этэллэр.
Ол курдук, регистрацияны ааспыт хандьыдаат сууттана сылдьыбыт түгэнигэр, кинини регистрациялаабыт быыбардыыр хамыыһыйаҕа сууттаммытын туһунан суругунан иһитиннэриини оҥоруохтаах. Маны таһынан, агитацияны ыытар матырыйааллар муҥутуур сыаналара биир бородууксуйаҕа тиийинэн олоруу алын кээмэйин 2 %-гар тэҥнэһиэхтээх. Билигин сокуонунан муҥутуур сыана 100 солкуобайга тэҥнэһэр.
Быыбардыыр хамыыһыйа мунньахтарыгар информацияны киэҥник тарҕатар сириэстибэлэр бэрэстэбиитэллэрэ үлэ дуогабарынан эрэдээксийэлэргэ үлэлиир эрэ буоллахтарына, аккредитацияны ааһыахтаахтар.
Манна даҕатан эттэххэ, бу иннинэ Киин быыбардыыр хамыыһыйа Бэрэсидьиэн быыбарын сокуонун ырытан көрүөхтээҕин туһунан РФ Киин быыбардыыр хамыыһыйатын бэрэссэдээтэлин солбуйааччыы Николай Булаев суруналыыстарга иһитиннэрбитэ. Бу чуолаан электроннай куоластааһыны (ДЭГ) киллэрии туһунан буолуон сөп, маннык ньыма судаарыстыба салайааччытын талыыга биирдэ да туттулла илик диэн «Российская газета» бэлиэтиир.
-
0
-
0
-
0
-
0
-
0
-
0
