Саха Өрөспүүбүлүкэтин Судаарыстыбаннай былааҕа – судаарыстыба сүрүн бэлиэтэ. Ону сэргэ, өрөспүүбүлүкэ бары омуктарын сомоҕолуур бэлиэ буолар. Саха Өрөспүүбүлүкэтин Судаарыстыбаннай былааҕа 1992 сыл алтынньы 14 күнүгэр Саха Өрөспүүбүлүкэтин Үрдүкү Сэбиэтин 15-с сиэссийэтигэр бигэргэммитэ итиэннэ ити күн 17 чаас 50 мүнүүтэҕэ Үрдүкү Сэбиэт дьиэтин үрдүнэн, Арассыыйа Федерациятын Судаарыстыбаннай былааҕын кытары сэргэстэһиннэрэ ыйаммыта. Арассыыйа Федерациятын судаарыстыбаннай геральдикатын регистрыгар 183 №-инэн бэлиэтэммитэ.
Саха Өрөспүүбүлүкэтин былааҕын эскииһин Л.Д. Слепцова, М.Г. Старостин, А.П. Захарова оҥорбуттара. Былаах түөрт муннуктуу быһыылаах, халлаан күөх, маҥан, кыһыл уонна от күөҕэ дьүһүннэрдээх. Ортотугар үөһэ ортотугар үрүҥ күн ойуулаах. Маҥан дьүһүн – хоту дойду кэрэ айылҕатын дьүһүйэр, от күөҕэ – уйгу-быйаҥ, доҕордоһуу бэлиэтэ, кыһыл өҥ – төрөөбүт дойду кэрэтин ойуулуур уонна төрөөбүт дойдуга бэриниилээх буолууну көрдөрөр.
Саха Өрөспүүбүлүкэтин Судаарыстыбаннай былааҕын өҥнөрө Арассыыйа Федерациятын Судаарыстыбаннай былааҕын өҥнөрүн кытта дьүөрэлэһэр, Арассыыйаны кытта биир сомоҕо буоларын көрдөрөр.
-
0
-
0
-
0
-
0
-
0
-
0
