Хаҥалас улууһун “Туймаада экопиэрмэ” ХЭТ-титтэн Бүлүү улууһун Хаҕын кэпэртиипбэ 10 симментель боруода тыһаҕаһы атыылаһан, бу күннэргэ массыынан тиэйэн илтэ. Томпо улууһун Кириэс Халдьаайы нэһилиэгин пиэрмэрэ Трофим Охлопков Ньурба улууһун “Күндээдэ” АУо-тыттан 27 симменталь тыһы тыһаҕаны атыыласта.
– Тыһаҕастарбытын атыылаһарга, таларга уонна аҕаларга көмөлөспүт “Сахаагроплем” кэлэктиибигэр, салайааччы Алексей Жирковка, зоотехниктар Вера Васильеваҕа, Татьяна Протопоповаҕа уонна айаҥҥа арыаллаабыт Сергей Чердоновка махтанабыт. Ыраах айаны тыһаҕастарбыт үчүгэйдик тулуйдулар. Аара Бүлүү улууһун Дьөккөнүгэр, Исидор Ионов бааһынай хаһаайыстыбатыгар уонна Дьокуускайга “Сахаагроплем” баазатыгар сүөһүлэрбитин хоннорон, сынньаттыбыт. Ньурбаттан үс хонук айаннаан, дойдубутун булан үөрэн ахан олоробут. Күн бүгүн 300 сүөһүлээхпит, ол иһигэр 135 ыанар ынахтаахпыт, саҥа тиҥэһэлэргэ тирэҕирэн сүөһүбүт боруодата тупсуоҕа, көрдөрүүбүт өссө үрдэтиллиэҕэ, -- диэн кэпсээтэ Светлана Саввична Охлопкова.
-
0
-
0
-
0
-
0
-
0
-
0
