Күрэхтэһии рекордсмен-ыанньыксыт Павел Шарин 70 сааhын туолар үбүлүөйүгэр анаммыта, ыҥырыылаах ыалдьыттар Үлэ Доруойдара Михаил Готовцев, Владимир Михайлов эдэр биир идэлээхтэригэр кэс тылларын эттилэр. Элбэҕи сүбэлээтилэр-амалаатылар.
Массыынанан ыаһын оператордарын өрөспүүбүлүкэтээҕи күрэхтэһиилэригэр өрөспүүбүлүкэ 10 улууһуттан уонна Дьокуускай куораттан барыта 32 ыанньыксыт кэлэн, үс түһүмэҕинэн күрэхтэспиттэрэ. Ынаҕы аппараатынан ыыры таһынан, аппарааты ыһан баран хомуйарга күрэхтэспиттэрэ, ыанар ынах анатомиятыгар, физиологиятыгар итиэннэ көрүү-истии, аһатыы-сиэтии уратыларыгар сыһыаннаах ыйытыыларга хоруйдаабыттара.
Түмүккэ Мэҥэ Хаҥалас улууһун «Тумул» кэпэрэтиибин ыанньыксыта Татьяна Десяткина уонна эдэрдэргэ Бүлүү улууһун «Бөтүҥ» кэпэрэтиибин ыанньыксыта Василий Дмитриев эҥкилэ суох кыайыыны ситистилэр. Иккиэн аны аҕыйах хонугунан, атырдьах ыйын 26-29 күннэригэр, Владимирскай уобалас Суздаль куоратыгар ыытыллар массыынанан ыаһын оператордарын Бүтүн Арассыыйатааҕы күрэхтэһиилэригэр өрөспүүбүлүкэ аатын көмүскүү бараары бэлэмнэнэ сылдьаллар.
Кинилэри таhынан күрэхтэһии судьуйаларын бөлөҕүн састаабыгар үлэлии «Сахаагроплем» уопуттаах исписэлииһэ, Саха Өрөспүүбүлүкэтин үтүөлээх зоотехнига Татьяна Протопопова барар. Бүтүн Арассыыйа таһымнаах улахан күрэхтэһиигэ Саха Өрөспүүбүлүкэтин бэрэстэбиитэлэ судьуйалыыра биһиэхэ улахан чиэс-бочуот итиэннэ элбэх сыллаах үлэбит сыанабылын кэрэhитэ буолар диэн бэлиэтиир сиэрдээх. Саха сирин дэлэгээссийэтин министиэристибэ Сүөһүнү иитиигэ, племенной дьыалаҕа, кэпэрээссийэҕэ уонна бааhынай хаhаайыстыбаларга департаменын салайааччы Василий Бессонов салайан илдьиэҕэ. Күрэхтэһии чэрчитинэн ынах сүөhүнү иитиигэ, племенной үлэҕэ мунньахтар, сэминээрдэр уонна уопут атастаhыыта ыытыллара былааннанар.Бу туһунан Тыа хаhаайыстыбатын уонна ас-үөл бэлиитикэтин министиэристибэтин Сүөһүнү иитиигэ, племенной дьыалаҕа, кэпэрээссийэҕэ уонна бааhынай хаhаайыстыбаларга департаменын салайааччытын солбуйааччы, биология билимин хандьыдаата Галина Осипова кэпсээтэ. Сиһилии «Ил Түмэн» хаһыат кэлэр нүөмэригэр билсиҥ.
Хаартыска: Тыа хаһаайыстыбатын уонна ас-үөл министиэристибэтин пресс-сулууспатын уонна «Тумул» кэпэрэтиип түһэриилэрэ.
-
0
-
0
-
0
-
0
-
0
-
0
