Муус устар 24 күнүгэр улуус дьокутааттара Таатта түөрт нэһилиэгэр дьону-сэргэни кытары көрүстүлэр. Ол курдук, Ытык-Күөлгэ Петр Егорович Захаров, Екатерина Ивановна Ермолаева, Сергей Никтополионович Слепцов, Уолба нэһилиэгэр Алексей Валентинович Аржаков, Семен Николаевич Андросов, Сергей Степанович Михайлов, Орто Аммаҕа (Харбалаахха) Алексей Дмитриевич Рахлеев уонна Амма нэһилиэгэр (Чычымахха) Владимир Владимирович Кривошапкин олохтоохтордуун сирэй көрсөн кэпсэттилэр, кыһалҕаларын билистилэр. Бу көрсүһүү СӨ Ил Дархана 2017 с. муус устар 5 күнүгэр бигэргэппит 307-РГ №-дээх «Өрөспүүбүлүкэ үрдүнэн олохтоохтору кытары көрсүһүү күнүн ыытар туһунан» балаһыанньатыгар олоҕуран ыытылынна.
Олохтоохтор сүрүннээн олорор усулуобуйаны тупсарыыга баар кыһалҕаларын, чуолаан, дьиэнэн-уотунан хааччыйыы, дьиэ акылаатын уларытыы, киин ититиигэ холбонуу, суолу аспааллааһын, тротуардары оҥоруу боппуруостарын туруорустулар. Дьокутааттар көрсүһүү түмүгүнэн сөптөөх миэрэлэри ыларга үлэлэһиэхтэрэ.
Бу улууспут дьокутааттара быыбардааччыларын кытары маҥнайгы көрсүһүүлэрэ буолбатах, - диэн бэлиэтээн этэр улуус дьокутааттарын Сэбиэтин бэрэссэдээтэлэ Петр Петрович Максимов, - Биирдиилээн кыһалҕалаахтары кытары куруутун үлэлэһэбит. Буолан ааспыт көрсүһүүгэ дьокутааттар нэһилиэктэр халаан уутугар төһө бэлэмнээхтэрин, туох кыһалҕаларын билистилэр, кыстыгы туорааһын хайдах ааспытын ырытыстылар. Нэһилиэктэр баһылыктарын кытары үлэбит ситимнээхик уонна көдьүүстээхтик ыытыллар.
Антонина НЕУСТРОЕВА
-
4
-
0
-
0
-
0
-
0
-
0
