Ил Түмэн Бэрэссэдээтэлэ Алексей Еремеев дойдуларыттан, төрөппүттэриттэн тэлэһийэн, балыыһаҕа эмтэнэ сылдьар оҕолору өйүүр олус наадалааҕын тоһоҕолоон бэлиэтээтэ.
-- Саҥа дьылынан бэлэх ылбыт үөрүүлэрэ оҕолор түргэнник үтүөрэллэригэр, чөллөрүгэр түһэн, дьонноругар тиийэллэригэр көмөлөһүөҕэр эрэнэбит, итэҕэйэбит, -- диэтэ испиикэр.
Аахсыйа кыттыылаахтарын көмөтүнэн, Ил Түмэҥҥэ 150-тан тахса бадаарак хомулунна. Ол иһигэр, араас оонньуурдар, кинигэлэр уо.д.а. бааллар.
“Хорсун санаа хоппото” (“Коробка Храбрости”) – балыыһаҕа сытан, уһун кэмнээх эмтэниини барар оҕолору өйөөһүҥҥэ, кинилэр санааларын бөҕөргөтөргө, күүһүрдэргэ анаммыт социальнай бырайыак буолар. Процедурнай кэбиниэттэргэ туруоруллубут хоппоттон сөбүлээбит бадаарактарын оҕолор бэйэлэрэ талан ылаллар.
Былырыын хомуллубут оонньуурдар Мэдиссиинэ киинин Педиатрическай салаатыгар, Оҕо инфекционнай балыыһатыгар уонна Оҕо тубсанаторийыгар бэриллибиттэрэ. Олорго саҥа төрөөбүт кырачааннартан саҕалаан, 500-чэкэ оҕо сытар, эмтэнэр. Быйыл балыыһалар испииһэктэрэ кэҥэтилиннэ, сорох хопполор улуустарга ыытыллыахтара. Ол туһунан Ил Түмэн пресс-сулууспата иһитиннэрэр.
Хаартыскалар Ил Түмэн саайтыттан.
-
0
-
0
-
0
-
0
-
0
-
0
