Быйылгы сүбэ мунньахха сүрүн болҕомто профильнай үөрэх саайдыытыгар уурулунна. Тохсунньу 21 күнүгэр “Экэниэмикэ тутаах салааларын сайыннарыыга үөрэх уонна билим” пленарнай мунньах буолла. Манна Ил Дархан Айсей Николаев биир кэлим үөрэхтээһин тиһигин сүрүн сыалынан үрдүк таһымнаах каадырдары бэлэмнээһин буоларын санатта: “Чуолаан үөрэх тэрилтэлэрэ бэлэмнээбит исписэлиистэрин экэниэмикэҕэ кылааттара, кинилэр көдьүүстэрин сүрүн сыанабылынан буолар”, - диэтэ Ил Дархан.
Сүбэ мунньах кыттааччылара оскуола үөрэнээччилэригэр инники идэлэрин талалларыгар көмөлөһүү сүрүн сорук буоларын тоһоҕолоон бэлиэтээтилэр. Оскуолалар, профессиональнай үөрэх тэрилтэлэрэ уонна үлэ биэрээччилэр бииргэ үлэлээһиннэрин бастыҥ быраактыкатын ырыттылар, көдьүүстээх ньымалары сырдаттылар, үлэ ырыынагар ирдэнэр исписэлиистэри бэлэмнээһин боппуруостарын дьүүллэстилэр.
Мунньах үлэтин үгэс буолбут халыыбын таһынан, Үлэ Кыбаарталыгар үөрэх тиһигин Аҕа дойду Улуу сэриитин сылларынааҕы үлэтигэр аналлаах быыстапка тэриллиннэ. Быыстапка “Дьокуускайдааҕы сэминээрийэни уонна педагогическай техникуму бүтэрбиттэр – Аҕа дойду Улуу сэриитин кыттыылаахтара”, “Аҕа дойду Улуу сэриитин Дьоруойдарын аатын сүгэр оскуолалар”, “Аҕа дойду Улуу сэриитин сылларыгар идэлээх үөрэхтээһин” тиэмэлэринэн аттарыллан турда.
Мунньах биир сүрүн хайысхатынан патриотическай иитии боппуруостарын дьүүллэһии буолла. Ол курдук, “Патриотическай иитии биир кэлим тиһигэ: уратылар, уопут, проблемалар” стратегическай сиэссийэ уонна “Төрөөбүт дойду туохтан саҕаланар?” мөккүһүү кулууба үөрэх тэрилтэлэрин салайааччыларын, төрөппүттэри уонна патриотическай иитиигэ исписэлиистэри бииргэ түмтүлэр. Бу тэрээһиннэр иилэринэн ыытыллыбыт дьүүллэһии оҕо уонна ыччат иитиитигэр тирээн турар кыаҕы өссө дириҥник өйдөтүүгэ улахан суолталаах буоллулар.
Маны таһынан, үс күн устата үөрэхтээһин бары тиһигин хабар төгүрүк остуоллар, стратегическай сиэссийэлэр уонна маастар-кылаастар ыытылыннылар.
Антонина НЕУСТРОЕВА
Хаартыскалар СӨ Ил Дарханын уонна Бырабыыталыстыбатын пресс-сулууспатын уонна СӨ Үөрэххэ уонна наукаҕа министиэристибэтин ТГ-ханаалларыттан ылыныллылар
-
0
-
0
-
0
-
0
-
0
-
0
