Мунньахха тустаах хаһаайыстыбалар салайаачылвапрын, исписэлиистэрин сэргэ «Сири оҥоруу сулууспата», «Мелиорация управлениета» судаарыстыба бүддьүөтүн тэрилтэлэрин, Россельхозкиин Саха сиринээҕи салаатын, М.Г. Сафронов аатынан Саха Сиринээҕи ТХНЧИ, АГАТУ бэрэстэбиитэллэрэ, ону таһынан Новосибирскайтан Судаарыстыбаннай аграрнай университет, «АгроАльянс», «Семена Сибири» уонна «Надежда» хааччахтаммыт эппиэтинэстээх тэрилтэлэр бэрэстэбитэллэрэ кытыннылар.
Сүбэ мунньаҕы тыа хаһаайыстыбатын уонна ас-үөл бэлиитикэтин миниистирин солбуйааччы Сахаяна Павлова салайан ыытта. Ааспыт 2024 сыллаах үлэ түмүктэрэ ырытылынна, саҥа сыл соруктара туруорулунна, сааскы ыһыы сиэмэтинэн хааччыллыы туруга, силиэксийэ үлэтин таһыма ырытылынна.
Сиртэн үүнээйини ылыы уонна мелиорация департаменын салайааччы Вячеслав Гаврильев иһитиннэрбитинэн, ааспыт сайын төһө да кураан буоллар, сөптөөх өйөбүл оҥоһуллан, оҕуруот аһын хомуурун уонна сүөһү аһылыгын бэлэмнээһин былааннара сүрүннээн толоруллубут. Сааскы ыһыыны тэрийиигэ көрүллүбүт харчыны быйыл эмиэ кэмигэр тиэрдэр сорук турар эбит.
Араас улуустапртан түмсүбүт сир уусттара, агрономнар уонна хаһаайыстыбалар салайааччыллара, исписэлиистэрэ сиртэн үүнээйини ылыы үлэтигэр наука ситиһиилэрин, инновационнай технологиялары, минеральнай уоҕурдуулар уонна үүнээйини харыстыыр сириэстибэлэр саҥа көрүҥнэрин туһаныы, үлэ тиэхиньикэтинэн, ыһыы сиэмэтинэн хааччыллыы туһунан санаа атастастылар. Болҕомтону бэйэбит учуонайдарбыт сыралаһан таһаарбыт, олохтоох усулуобуйаҕа сөп түбэһэр, курааҥҥа уонна эрдэтээҥҥи хаһыҥҥа тулуктаһар суортар сиэмэлэрин элбэтэн, хаһаайыстыбаларга тарҕатыыга, сиртэн үүнээйини ылыы салаатыгар оҥоһуллар өйөбүл ырычааҕын тупсарыыга, сааскы ыһыы уонна күһүҥҥү хомуур былааннарыгар туһаайддылар.
Хаһаайыстыбалар салайааччылара көрүллэр өйөбүл харчыта былырыыҥҥы 2024 сыл таһымтан аччатыллыбатыгар баҕардылар. Үрдүк үүнүүнү ыларга сүрүн быһаарар оруолу чуолаан үлэ тиэхиньикэтинэн итиэннэ күннээҕи үлэни технология быһыытынан аттаран салайар каадырынан хааччыллыы, бааһына иэнин кэҥэтии, быраҕыллан сытар сирдэри туһаҕа таһаарыы итиэннэ кэлии сиэмэнэн үлүһүйбэккэ, олохтоох усулуобуйаҕа ууһатыллыбыт суортар сиэмэлэрин ыһыы ыллалларын тоһоҕолоон бэлиэтээтилэр.
Хаартыскаҕа Анна Сергучева (ТХАҮөБМ) түһэриитэ
-
2
-
0
-
0
-
0
-
0
-
0
