Үөрэх эйгэтигэр быраабы күөмчүлүүр быһыыны-майгыны утары боппуруостарга туһаайыллыбыт докумуон үөрэнээччилэргэ, төрөппүттэргэ уонна педагогтарга ананар, итиэннэ кинилэр хардарыта алтыһыыларыгар төһүү күүс буолар.
«Быраабы күөмчүлүүр быһыыны-майгыны сэрэтии биһиги үлэбит сүрүн хайысхатынан буолар, маныаха, бу эйгэҕэ быһаарыылар мэлдьи төрөппүттэри уонна педагогтары кытта бииргэ ылыллаллар. Саҥа өйдөтөр сурук мөкү түбэлтэни быраап үнүстүрүмүөннэринэн суһаллык быһаарарга кыах биэрэрин таһынан, күөмчүлээһини туоратарга, өйдөтөр-сырдатар үлэни ыытарга көмөлөһөр. Бу матырыйаал өйдөтөр-сырдатар тиһиги сайыннарыыга атын биэдэмистибэлэри, билим уонна уопсастыбаннай тэрилтэлэри кытта кэлим үлэ сорҕотунан буолар», - диэн Үөрэх миниистирэ Сергей Кравцов бэлиэтээн эттэ.
Сурук быраабы күөмчүлүүр быһыы-майгы көрүҥнэрин быһаарар, итиэннэ сонордооһун түгэнигэр буруйу оҥорооччулар, ол иһигэр сокуоннай саастарын ситэ илик оҕолор дисциплинарнай, административнай, холуобунай эбэтэр гражданскай-правовой эппиэтинэскэ тардыллыахтарын сөбүн быһаарар.
Сотору кэминэн матырыйааллар Арассыыйа бары эрэгийиэннэрин оскуолаларыгар, кэллиэстэригэр уонна эбии үөрэхтээһин тэрилтэлэригэр ыытыллыахтара. Үөрэтэр, сэрэтэр уонна сүбэлиир дьаһаллар тэриллиэхтэрэ.
Күөмчүлээһиҥҥэ, сонордооһуҥҥа түбэспиттэр исписэлиистэртэн, ол иһигэр, минпросвещение суукканы төгүрүччү үлэлиир уйулҕа көмөтүн линиятыгар эрийэн көмө көрдүөхтэрин сөп: 8 (800) 600-31-14.
Оскуолаҕа иирсэни бэрээдэктээһин, медитация уонна иллэһии боппуруостарыгар Москуба бириэмэтинэн үлэ чааһыгар 09:00-18:00 итии линия үлэлиир: 8 (800) 222-34-17.
Ону тэҥэ оҕолорго, ыччаттарга уонна кинилэр төрөппүттэригэр аналлаах итии линия бүтүн арассыыйатааҕы төлөпүөнүгэр күнүстэри-түүннэри босхо эрийиэххэ сөп: 8 (800) 200-01-22.
Методическай докумуону Саратовтааҕы судаарыстыбаннай юридическай акадьыамыйа, итиэннэ Оҕолор бырааптарын уонна интэриэстэрин көмүскүүр киин оҥордулар (Саратовской государственной юридической академией, Центром защиты прав и интересов детей).
Хаартыска: #Новости_МП
-
0
-
0
-
0
-
0
-
0
-
0
